- Finnmárkku Boanddaid Searvi berre digaštallat ášši FeFo:in maŋŋá luomu, lohká Tretnes.
Fefo (Finnmárkku opmodat) dat lea cealkán ahte dás rájes eai beasa šat boanddat oastit eatnamiid, muhto galget láigohit.
Finnmárkku Boanddaid Searvvi jođiheaddji Fred Johnsen, lohká mearrádusa áibbas endorii.
- FeFo stivrrain gulahallat
- Dál oainnán mun ahte Fefo ii leat várra gulahallan doarvái bures boanddaiguin ja smávva doaluiguin dán áššis.
Fefo han lea lohkan iežas strategijas ahte áigot vuhtii váldit iešguđege beliid ja ealáhusaid, ja dan eai oro dahkan dán áššis. Boanddat berrejit váldit oktavuođa Fefo:in, lohká Tretnes.
- Finnmárkku Kommišuvdna mearrida
Tretnes gohčoda Fefo mearrádusa garra mearrádussan, muhto muittuha sihke Fefo:i ja earáide ahte Finnmárkku Kommišuvdna han maid boahtá.
- Dat han galgá guorahallat geat leat oamasteaddjit daidda eatnamiidda Finnmárkkus. Guorahallan šáhttá čájehit ahte omd. boanddat, geat guhkit áiggi leat doalahan eatnamiid, sáhttet leat eambbo eaiggádat eatnamiidda go Fefo ieš. Muhto dán mii eat dieđe vuos, lohká Tretnes.
Sámediggái ášši
- Mu mielas ii leat veadjemeahttun ahte Sámediggi šaddá digaštallat ášši Fefo:in, lohká Tretnes.