NRK Meny
Normal

- Ráđđehusas lea beaktilis sámepolitihkka

Ođđa ráđđehusas lea beaktilis sámepolitihkka, vaikko vel das lea ge Ovddádusbellodat mielde, lohká Olgešbellodaga nubbinjođiheaddji Bent Høie.

regjeringsforhandlinger

Ráđđehusšiehtadallamat mat leat leamaš dáid maŋimuš vahkkuid. Ovddemusas gurut bealde Bent Høie (O) olgeš bealde ges Kjetil Solvik-Olsen (Ob). Dat earát Ovddádusbellodagas leat Per Sandberg, Siv Jensen og Finn Egil Holm. Olgežis ges Jan Tore Sanner ja boahttevaš stáhtaministtar Erna Solberg.

Foto: Junge, Heiko / NTB scanpix

Ikte dat almmuheigga dien guovtti bellodaga jođiheaddji guovttos ođđa Ráđđehusa ovttasbargošiehtadusa. Das boahtá ovdan ahte Ovddádusbellodat, mii dáhtošii heaittihit Sámedikki lea gártan hilgut dieid áigumušaid, lohká Høie.

Son lea rámis ođđa ráđđehusa sámepolitihkain, mii oppalaččat lea sullii dat seamma maid Stuorradikki eanetlohku olu jagiid juo lea dorjon, lohká Høie. Ovddádusbellodat lea unnitlogus leamaš guhká jo dáidda guoski áššiin, deattuha Høie.

Dušše sis lea áigumuš heaittihit

Ovddádusbellodaga nubbinjođiheaddji Ketil Solvik Olsen duođašta Høie cealkámušaid.

Dálá dilis fertejit sii doarjut oktasaš ráđđehusa sámepolitihka, go eai leat eará bellodagat seamma oaivilis go sii sámepolitihkalaš ássiin, lohká Solvik Olsen.

Bisuhit Sámedikki

Ráđđehusa ovttasbargošiehtadusas eai leat gal nu galle cealkaga čállon sámi guoski áššiid birra, muhto Olgeš- ja Ovddádusbellodagaid oktasaš ráđđehus dáhttu aŋkke seailluhit Sámedikki, ja nannet sámi árbevirolaš ealáhusaid.

Ođđa ráđđehus áigu maid bisuhit Sámedikki, Stuorradikki ja Ráđđehusa gaskasaš konsulterenortnega. Ráđđehusa mihttomearri lea maid nannet sámegiela, earret eará rádjarasttildeaddji ovttasbarggu bokte.

Boahtte vahku mielde dáidá Olgešbellodaga jođiheaddji ja ođđa stáhtaministtar Erna Solberg almmuhit iežas ođđa ráđđehusa.