NRK Meny
Normal

- Massá giela go ii leat oahpahus

Lillestrømma Vigernes skuvla ii nagut skáhpput sámegieloahpahusa iežas goalmmát luohkkálažžii, muitala skuvlla rektor Olav Strømhylden.

Samiske bøker
Foto: Eilif Aslaksen / NRK

Vilde Kristine Thrane vázzá goalmmát luohkás ja son ii leat ožžun sámegieloahpahusa vuosttaš luohká rájes go eai gávdno sámegieloahpaheaddjit.

Dán čávčča lei sutnje lohppiduvvon neahtaoahpahus, muhto ii dat ge oro ordnašuvvamin váilevaš oahpponávccaid dihte.

GULDAL: Ii oaččo sámegiela

Eadni váivašuvvá

Eatni Janne Thrane váivašuvvá go nieiddaš ii fidne dan oahpahusa maid galggašii.

Vilde Kristine Thrane eatni, Janne Thrane, lohká ahte dat lea surgat go su nieiddas ii fitne sámegieloahpahusa. Son massá vejolašvuođa oažžut sámegiela nubbingiellan ja oahppat giela.

Skuvla lohpida

Go Vilde lei vuosttaš luohkás de lei skuvllas sámegieloahpaheaddji, muhto oahpahus ii doaibman nu mo galggai.

Go nieiddaš álggii nuppi luohkái ii lean skuvllas šat oktage sámegieloahpaheddjiid, ja son lohppiduvvui oažžut neahtaoahpahusa go álgá goalmmát luohkkái.

Ii veahkki Finnmárkku skuvllain

Dál čájehuvvo ahte dat ii leat nu álki, dasgo eai leat doarvái oahpponávccat Finnmárkku skuvllain fállat neahtaoahpahusa oahppiide geain lea vuoigatvuohta oažžut sámegieloahpahusa.

Dál lea eahpečielggas goas ja oažžu go Vilde obanassiige sámegieloahpahusa. Janne Thrane lohká ahte nieiddas šaddá heajut ja heajut giella go ii oaččo oahpahusa.

Ii neahta boktege

Rektor Vigernes skuvllas, Olav Strømhylden, duođašta ahte sis leat váttisvuođat gávdnat sámegieloahpaheaddji. Dasa lassin eai leat ge ožžun mákkárge šiehtadusa neahtaoahpahusa ektui skuvllain Finnmárkkus.

Dan vástádusa maid Vigernes skuvla lea ožžun skuvllain mat fállet neahtaoahpahusa lea ahte dat leat nu ollusat vuordimin jo dán fálaldaga ahte sii eai sáhte váldit vel eambbo oahppiid.

Vigernes skuvlla rektor lohká ahte sii vuoruhit dán ášši, ja doivot ahte gii nu ohcá oahpaheaddji virggi mii dál lea álmmuhuvvon.