NRK Meny
Normal

- Lágádusat návccaid haga

Lágádusain eai leat doarvái návccat gárvet oahpponeavvuid, lohká Iđut lágádusa beaivválaš jođiheaddji, Åge Persen

 

Foto: NRK / NRK

Dušše bealli oahpponeavvuin maidda Norgga Sámediggi lea addán doarjaga leat gárvvistuvvon.

Iđut lágádusas leat badjel 30 oahpponeavvoprošeavtta mat eai leat vel gárvvistuvvon.

- Mis eai leat leamaš návccat gárvet buot prošeavttaid rievttes áigái, lohká Persen.

  GULDAL: Lágádusat návccaid haga

- Ráhkadeaddjit eai geargga

- Muhtun barggut leat maŋŋonan dan geažil go ráhkadeaddjit dahje girječállit eai leat vel geargan dainna bargguin.

Maŋŋoneapmi boahtá maid das go Iđut lágádusas eai leat doarvái návccat, go moai letne dušše guovttá dápppe. Mis leat olu eambbo barggut go dat mat gusket oahpponeavvuide. 

Dalle ádde juohke okta go dušše guokte olbmo galget buot dieid buvttadit, ahte lea menddo unnán kapasitehta, lohká Persen

Váidalan dili

Sámi oahpaheaddjit leat guhká váidalan oahpponeavvodili sámi skuvllain.

Samiske bøker
Foto: Eilif Aslaksen / NRK

Norgga Sámediggi lea geahččalan buoridit dili ja lea 2001:s 2005` rádjái juolludan badjel 68 milijuvnna ruvnno oahpponeavvobuvttadeapmái.

Lihká leat dušše bealli dan 315 oahpponeavvoprošeavttas mat alggahuvvojedje dien aigodagas gárvvistuvvon.

10 miljovnna 4 jagis

Iđut lágadus lea okta lágadusain mi lea ožžon doarjagiid buvttadit oahppanevvuid.

Measta logi miljovnna ruvnno lea lágadus ožžon Sámedikkis 2001 ja 2005  gaskka oahpponeavvobuvttadeapmái.

Persen datte lohpida ahte buot álggahuvvon oahpponeavvut galget gárvvistuvvot dađistaga.

- Lágádusas eai jerran

- Dat reforma maid Sámediggi čađahii 2000:s, dasa eat beassan min lágádusas váikkuhit mo ge. Mii eat beassan buktit iehčamet oaiviliid áššái ja mii fertiimet beare ohcagoahtit dieid eavttuid vuođul maid Sámediggi dalle bijai.

Dál čájehuvvo ahte ortnet ii doaimma, ja dat ii sáhte doaibmat albma láhkai, oaivvilda Persen.

- Ovddasfástádus Sámediggái

- Sámediggi ferte váldit eambbo ovddasfástádusa oahpponeavvobuvttadeamis, jus dat galggaš doaibmat boahtteáiggis,  lohká Persen