Normal

- Ii álgán stáhtačállin

Inger Marit Eira-Åhrén (38) doaivu, ahte ministar ii behtton.

Inger Marit Eira-Åhren
Foto: privat

- Mun in boađe bargat stáhtačállin dán lagamuš jagis, muitala Eira-Åhrén NRK:ii.


Son duođašta dál, ahte stáhtaráđđi Rigmor Aasrud válddii suidne oktavuođa ja jearai álggášiigo son sámeáššiid stáhtačállin.


- Doaivvun, ahte ministtar ii behtton suidne.


Eira-Åhrén muitala, ahte su mearrádus vuođđuduvvá obbalaš árvvoštallamii dálá bargo- ja bearašdilis.


- Sus lea eará gelddolaš áššit jurdagiin, maid áigu čađahit dál. Son háliida maid leat ovttas mánáinis nu olu go vejolaš ja dat ii livčče lihkostuvvan, jus son jođašii Oslos barggus.

Eira-Åhrén dovddaha gal, ahte lei stuorra gutni suidne, go stáhtaráđđi riŋgii suidne.

LOGA VULOBEALDE MII OVDAL LEA ČÁLLON DÁN ÁŠŠIS:

- Stáhtaráđđi berre leat nissonolmmoš

Boahtte sámi stáhtačálli berre leat nissonolmmoš. Ja Davvi-Trøndelaga fylkkadiggeáirras, Inger Marit Eira-Åhrén, lea nannoseamos evttohas. Dan oaivvilda Bargiidbellodaga sámepolitihkálaš ráđi jođiheaddji Magnhild Mathisen.

- Son ii kommentere dan, leago su jerron vai ii, vástida Eira-Åhrén.

- Nana politihkalaš duogáš

Bargiidbellodaga sámepolitihkalaš ráđi jođiheaddji, Magnhild Mathisen čilge manin Ravrvihke nisu, Inger Marit Eira-Åhrén berre šaddat ođđa sámi stáhtačállin maŋŋá go Raimo Valle fertii guođđit dán ámmáha bearjadaga.

- Sus lea hui nana bargoduogáš, son dovdá maid Finnmárkku bures, go lea eret Guovdageainnus. Son lea bargan politihkakálaš ráđđeaddin dearvvasvuođa departemeanttas ovdal, čilge Mathisen.

Magnhild Mathisen (Ap).

Bargiidbellodaga sámepolitihkalaš ráđi jođiheaddji, Magnhild Mathisen.

Foto: Sametinget

Muhto čállosis maid lea juo sádden Norgga Bargiidbellodaga váldočállái Raymond Johansenii, leat maiddái eará namat.

Sámediggeáirras Deatnulaš Marianne Balto, ovddeš Unjárgga sátnejođiheaddji Ann-Jorid Henriksen ja sámediggeáirras Mátta-Várjjatlaš Mariann Wollmann Magga.

- Nissoniid vuorru

- Dán maŋimuš vihtta jagi, lea dán báikkis čohkkán almmáiolmmoš, dál lea nissonolbmuid vuorru, lohká Mathisen.

Váikke Mathisen ii leat bidjan dán listui, ahte gii livčče buoremus dán virgái, de lea sus goittotge alddis čielga vuosttasevttohas.

- Inger Marit Eira-Åhrén lea su mielas buoremus dása. Máttasámiid áššit berrejuvvošedje vuoruhuvvot, jus Eira-Åhren livčče stáhtačállin, de boađášedje Mátta-sámiid hástalusat buorebut oidnosii, muitala Mathisen.

GULDAL:

Eira-Åhrén lea eret Guovdageainnus Finnmárkkus, muhto orru dál Ravrvihkes, gos son lea čohkkán ovtta áigodaga bargiidbellodaga áirrasin gielddastivrras. Mannán čavčča válljejuvvui son Davvi-Trøndelaga fylkkadigge-áirrasin.

Almmáiolbmuid maid galget evttohit

Ovdal leat maid namat, dego Steinar Pedersen, Lene Hansen ja Ragnhild Vassvik Kalstad loktejuvvon ovdan, go leat smiehttan geas boahtá ođđa stáhtačálli.

Muhto dáin namain ii lean okta ge dan evttohuslistus, man Magnhild Mathisen lea sádden bellodatčálli Raymond Johansenii.

Dásseárvvu geažil leat sii gohčohallan gávdnat evttohasaid maiddái almmáiolbmuid gaskkas, mainna sii lea bargamin dál, muitala Mathisen.


- Leago Steinar Pedersen dán listus?


- Son sáhtášii gal leat, muhto son ii leat goittot vel evttohuvvon dohko, vástida Mathisen.

GULDAL MAID EIRA-ÅHRÉN LOHKÁ: