Su mielas livčče gássa buoret molssaeaktu Finnmarkkus, go bieggamillut.
- Mii galgat maid duostat áššiid smiehttat obalaččat ja sáhttitge de jearrat, ahte sáhtašiigo dán gássas, man mii buvttađat filkkas, oasi geavahit elrávdnjebuvttadeapmai. Iige dušše doalvut dan viidásut máilbmái ja Eurohpai? Jearra Sámedikkepresideanta Egil Olli.
Nuoskkiđa seamma olu, juoba eanet.
Olli váljje vástiđit ieš jieráldahkii ja oaivvilda leat buorre jurddan, geavahit energiijagálduid mat leat đasttan Finnamarkkus.
- Go dainna gássain buvttađuvvo energiija eará sajiin Eurohpas, de nuoskkiđa dat seamma olu ja juoba eanet, go šaddet dán maid jođihit vuos dohko, čilge Olli.
Danne oaivvilda sámedikkepresideanta, ahte gássáfápmu geasuha eanet, go omd. hukset bieggamilluid.
- Son doaivuge, ahte dát ášši guorahallojuvvo, nu ahte buot bealit váldojuvvojit vuhtii. Dát ii namalassii leat nu, ahte lea unnit váikkuhusat, go bieggamilloparka huksejuvvo, go daidda galgá gávdnot stuorra sadji. Ja nu eaige leat dušše bieggamillut molssaeaktun boahtteáigái, go daiguin maid leat negatiiva váikkuhusat, geažiđa Olli.