Eanáš olbmot geat mearridit fárret eret ovtta báikkis, fárrejit dohko gos sis leat buoret vejolašvuođat. Dát lea okta dain sivain, manne olbmot fárrejit eret Guovdageainnus, lohká guovdageaidnulaš servodatdutki Johan Klemet Kalstad.
NRK sámi loguid miel leat unnimusat 49 ássi Guovdageainnus aitto fárren, dahje leat fargga fárremin eará báikkiide.
Eanáš dain olbmuin geat leat fárremin, leat ovttasássit. Bárát fárrejit go nubbi sudnos ii lihkostuva oažžut barggu.
Lunddolaš lassáneapmi
Servodatdutki ii gohččot eretfárrema dramáhtalažžan.
- Guovdageainnus leamaš čađat nu, ahte dáppe fárrejit eanet eret, go maid fárrejit sisa. Ássiidlohku lea bisson lunddolaš lassáneami bokte, go lea eanet šaddan go jápmán olbmot.
Kalstad goitge oaidná váttisvuohtan dan go ruđain ii oaččo fávdnát suohkanis.
- Dán áiggaš olmmoš ii gille orrut dakkár báikkis, gos ii oaččo gálvvu ruđain. Doppe gos gávppašuvvo, de dat báiki ovdána.
