NRK Meny
Normal

- Hilgot bargobirasguorahallama

- Dákkár guorahallamis ii leat ávki, go bargit gáibidit bargobearráigeahču guorahallat, lohká advokahtá Randulf Riderbo.

Advokat Randulf Riderbo
Foto: Richardsen, Tor / Scanpix

Vuossárgga galgá muhtin priváhta fitnodat guorahallagoahtit váttisvuođaid Kárášjoga boazodoallokántuvrras, gos guokte bargi čuoččuheaba ahte leaba givssiduvvon.

-Bargobearráigeahčus dat livččii luohttámuš ja lea ge sin ovddasvástádus guorahallat dákkár bargosajiid gos máŋga bargi leat dieđihuvvon buohccin, belohahkii mobbema geažil, lohká Riderbo.

  GULDAL: Bargobiras guorahallan

 

- Leat almmuhan

Boazodoallohálddahusa vuolitdirekteuvrras, Hans Roar Christiansenis dat lea bargiidovddásvástádus.

Son ii hálit searvat jearahallamii Sámi Radios, muhto muitala ahte sii almmuhedje ahte ohcet fitnodaga gii sáhttá čađahit guorahallama ja vállje daid fálaldagaid vuođul maid ožžo sisa. Dađi eambbo ii hálit son dadjait áššái.

- Ii ovttasráđiid bargiiguin

Randulf Riderbo fas lohká ahte ii leat iešalddis dat mihkkege váttisvuođat ahte lea muhtun privahtafitnodat, muhto dalle livččii dat galgat dahkkot ovttaráđálaččat bargiguin.

Čilgehus reivves

Reivves maid buohccindieđihuvvon bargi lea sádden bargobearráigehččui, čilge son movt ja manne dovdá ahte ii nákce bargui hoavdda bargovugiid geažil.

Son čállá ahte lea fárrolaga eará bargiiguin gávnnahan ahte sii eai sáhte luohttit dán guorahallamii mii dál biddjo johtui, danne go bargiidorgansašuvnna ovddasteaddjit eai leat váldon fárrui prosessii gos guorahallan lea plánejuvvon.

Dan dihte gáibida bargi ahte Bargobearráigeahčču boahtá su bargosadjái.

- Buohkat leamaš mielde

Boazodoallohálddahusa bargiidhoavda Hans Roar Christiansenis ii mieđa dasa ahte bargit eai leat leamaš fárus dán proseassas.

Son dadjá sámi radioi ahte buohkat leat váldon mielde proseassas ja ahte bargiidovddasteaddjit leat leamaš fárus mearrideame ahte galgá bargoguorahallan.

- Diehtu buohkaide

Go Sámi Radio jearrá sus ahte movt guorahallama ráhkkaneapmi lea čađahuvvon, de ii hálit dan vástidit, muhto dadjá ahte buot bargit leat ožžon dieđu bargodili guorahallama birra.

Advokáhtas eará oaidnu

Bargi advokáhttá fas čuoččuha ahte su klieantta organisašuvnda ii leat beassan mielde čoahkkimiidda. 

- Ášši lea haksogoahtán, mii orru čájeheamen ahte boazodoallohálddahusas lea váttis ášši, lohká Riderbo.