NRK Meny
Normal

- Dát jávkada mearrasápmelašvuođa

Mearrasámit ballet, ahte guollebiebmanealáhus jávkada mearrasápmelaččaid kultuvrra.

oppdrettsanlegg
Foto: Marita Andersen / NRK

Vuotnaguolásteaddjit cakkadit dan, go Stierdnái, Álttávutnii, Oarje-Finnmárkui leat addon njeallje ođđa guollebiebmanlobi. Guolásteaddjit lohket, ahte guollebiebmanrusttegiid geažil Finnmárkku vuonain ii šat báljo gávdno guolli.

Dát bođii ovdan álbmotčoahkkimis mannan vahkkoloahpas Álttás, gosa ledje čoahkkanan birrasii 30 olbmo. Čoahkimis ledje sihke guolásteaddjit, guollebiebmanfitnodagaid ovddasteaddjit ja politihkárat.

GULDAL: Ballet kultuvrraset jávkat

- Áltávuotna ja -johká guorranit

Bjarne Johansen, leder i Tana- og omegn sjølaksefiskeforening.
Foto: Dan Robert Larsen / NRK

Deanu- ja birasgotti luossabivdiid searvvi ovdaolmmoš, Bjarne Johansen, lohká Nuorevuona, Gáŋgaviikkas duođaštit dan, ahte guollebiepmahagaid gárddit gurrejit vuonaid.

- Doppe lea oalát jávkan guolli. Álttávuonas leat eanemusat guollebiebmahagat olles Norggas. Dat šaddá seamma guorus, go doppe Vestlánddas, lohká Johansen.

- Áltávuotna nuoskkiduvvo ja luossa nohká Áltájogas, lohká Johansen.

- Šiitá

Helge Gåsø, styreleder i Astri og Altafjord Laks
Foto: Dan Robert Larsen / NRK

Guollebiebmanealáhusa ovddasteaddjit šiitet iežaset goarideamis vuonaid. Astri- ja Altafjord Laks stivrrajođiheaddji, Helge Gåsø, lohká ahte lea menddo álki sin sivahallat.

- Son ii loga ovttage dutki vel duođaštan dan, ahte guollegárddit jávkadivčče luondduguliid, lohká Gåsø.

- Váruha roasus

John Egil Nilsen, leder i den sjøsamiske fiskeriorganisasjonen Bivdi.
Foto: Dan Robert Larsen / NRK

Mearasámi guolástansearvvi Bivdi jođiheaddji, John Egil Nilsen, váruha roasus, go vuonaid gurrejit fuođđariid dihtii ja dán láhkai billistit luossanáli.

- Su mielas ferte muhtun bissehit dán. Muhtin vuonaide galggašii oalát gieldit bidjamis guollebiebmanrusttegiid, ovdalgo lea menddo maŋŋit, lohká Nilsen.