- Buorre jos viimmatge ihtet riekta čállon sámegiel šilttat sámi báikkiide, lohká Sámedikki várrepresideanta Johan Mikkel Sara.
Dan lohká son go Geaidnodoaimmahaga Davvi-Norgga doaibmi hoavda, Knut Arne Henriksen, dál lohpida ordnet sámi šilttaid geaidnoguoraide.
- Eai váldde duođaš
- Dál livčče áigi ordnegoahtit go mii han doalaimet čoahkkima dalle 2004:s, ja dalle lohpidii Geaidnodoaimmahat njulget áššiid. Dađi bahábut ii leat dáhpáhuvvan bearehaga dan maŋŋil.
Maid dat du mielas muitala?
- Eai dat váldde ášši duođas. Dasa lassin han dovddastii dalle maid Geadnodoaimmahat ahte lea sin ovddasfástádus galbet sámegillii. Dát ovddasfástadus ii guoskka dušše daid guovttegielat suohkaniidda, muhto juohke báikái Norggas gos leat dohkkehuvvon sámegiel namat, lohká Sara.
- Áiggošii vuoruhit
Ikte muitalii Geaidnodoaimmaha davvi-norgga doaibmi hoavda Knut Arne Henriksen, ahte áigot dál vuoruhit geaidnogalbbaid. Danin lea gulaskuddamin maid geaidnodoaimmahagas leat dán rádjái bargan oažžun dihte sámegiel šilttaid.
Šilttat divokeahttá
Golbma ja bealle jagi áigi deaivvadedje Sámediggi ja Stáhta geaidnodoaimmahat šilttaid olis. Dalle juo lohpidii geaidnodoaimmahat ordnet sámegiel šilttaid, nu mo láhka sin geatnegahttá.
Goittotge leat ain sámis boasttut čállojuvvon šilttat, mánga sajis maiddái váilot sámegiel geaidnogalbbat.
Čállinvuogit sivvan
Henriksen lohká ášši leat mohkái go leat nu mángalágan čállinvuogit ja soaitá ahte eai leat leamaš návccat ordnet rivtteslágan šilttaid.
Sámedikki várrepresideantta mielas eai doala diet ákkat.