Ná čielgasit dajai Guovdageainnu dálá várresátnejođiheaddji Dahl ievttá álbmotčoahkkimis. Son lea maid gurotbellodaga sátnejođiheaddji evttohas.
Okta gii čohkkái panelas lea Guovdageainnu Johttisápmelaččaid listtu evttohas Anders S. Buljo.
Son suoiggehii go gulai mo rikkis golle-ja minerála fitnodagat galget váldit sin saji.
Sávvá ođđa bargosajiid
Dáloniid listta sátnejođiheaddji evttohas, Hans Isak Olsen, gal sávašii maid ollu ođđa bargosajiid suohkanii, muhto son gal ii oba sáhte ge doarjut Anton Dahl árvalusa.
-Mun gal in jáhke boazodoalu dárbbaša oastit eret ruvkedoaimmaid dihte. Ii leat okta ge dán rádjái dárbbašan heaitit boazodoalus daid ruvkedoaimmaid dihte mat leat, ja nu ii šatta boahtteáiggis ge, lohká Olsen.
- Ii hehtte ruvkedoaimma
Bargiidbellodaga politihkkár Per Nils Saari lea bargan 25 jagi Biedjovákkis.
Son deattastii ahte ruvki gal buktá dietnasa, muhto ii sáhte guđege láhkai dohkkehit ákkastallama, ahte boazodoallu hehtte ruvkedoaimmaid.
- Ii duddjo buori
Guovdageainnu sátnejodiheaddji ja Sámi Álbmotbellodaga Klemet Erland Hætta, lohká iežas sakka beahttášuvvan go gulai maid Anton Dahl árvala.
-Dát ii duddjo buori, dadjá Hætta