Sámedikki ráđđelahttu Terje Trettnes lohká eiseválddiid ovddasvástádussan bearráidgeahččat ahte sápmelaččain lea dulka go šaddet buohccivissui.
Helse-Nord ráđđeaddi Ingvild Røe lea veahá eahpesihkkar gosa ovddasvástádusa galggaš bidjat.
Duogáš dása lea go 74 jahkásaš Ráikku-Niillas gieskat šattai dikšui Glittreklinihkii Mátta-Norggas. Son ii gulahala doaktáriiguin go ii máhte dárogiela doarvái bures, ja ballá ahte ii oaččo doarvái buori divššu go ii áddehála doaktáriiguin.
Dulkon lea dušše tlf bokte oktii váhkus.
Ollugat leat reageren go boares olmmoš šaddá dákkár dillái. Sápmelaš doavttir Ole Mathis Hetta lohká veadjemeahttumin bargat buohcciiguin jus ii áddehala singuin.
Dákkár áššiid galgá Helse-Nord gozihit, go jo lea dohkkáhan Glittreklinikken:a dikšobáikin. Dán áššis ferte muitit ahte Glittreklinikken lea riikaviidosaš dikšobáiki olbmuide geat buhcet geahpesdávddas, ja dat gávdno dušše okta dakkár olles Norggas.