NRK Meny
Normal

- Gal lei áigi eanadoalus beroštišgoahtit

- Sámediggi han lea guhkit áiggi juo badjilgeahččan sámi eanadoalu, lohká Máze eanadoalli Johan Tore Eira.

Sametinget
Foto: Eilif Aslaksen / NRK

Sámediggeráđđi lea gárvvistan ođđa eanadoallodieđáhusa sámi guovlluide.

Mihtun lea seailluhit vuođđoealáhusaid kulturriggodaga.

Eira vásáhus lea ahte eanadoallu oažžu gáržžit ja gáržžit birgenlági go eanadolliid árbevirolaš vuoigatvuođat čađat vuoittahallet eará beroštumiide.

GULDAL: Viimmat beroštišgoahtán

- Badjelgehččon ealáhus

Su máttut leat bargan ealáhusas eallenági, ja ieš ge bargagođii eanadoalus juo mánnán. 

Su čuoččuhus lea ahte eanadoallu badjelgehččo, ja danin son sávvá ge buresboahtima Sámedikkeráđi ođđa eanadoallodieđáhussii.

Ráđđelahttu ii ovttaoaivilis

Ráđđelahttu Terje Tretnes ii mieđit Sámedikki badjelgeahččat eanadoalu.

Terje Tretnes
Foto: Eilif Aslaksen / NRK

- Váldosisdoallu dán ođđa eanadoallodieđáhusas lea doalahit bargosajiid ealáhusas ja ráhčat dan ovdii ahte ealáhus ceavzá ja ovdána boahtteáiggis.

Láhppo dáža eanadollui

- Min vásáhus lea ahte sámi eanadoallu lea máŋgga ládje dážaluvvan go sápmelaččaid dilli ii leat dáža eiseváldiid eanadoallopolitihkkas váldon vuhtii doarvái bures, lohká Tretnes

- Mis leat maid rievttit

Johan Tore Eira sávvá dieđáhusas leat ávkki, nu ahte sámi eanadoalu árbevierut buorebut gáhttejuvvojit boahtteáiggis.

-Mis lea maid rievttit ja midjiide gullet dat lagas eatnamat, mat dál leat áidojuvvon eret mis ja gos mii láviimet guođohit ja luopmániid čoaggit. 

Dál fertet mii jearahit lobi dohko beassat, dohko gos mii agibeaivvi, máŋga buolvva čađa,  leat viežžan dan mii gulaš sámi eanadollui, lohká Eira.