– I dag er det altfor mange soner. Det gjer busstilbodet unødvendig komplisert, og gjer det vanskeleg for studentane å velja bussen, seier leiar i Rogaland Venstre, Kjartan Alexander Lunde.
I dag må studentar som vel kollektivt i fylket betala for månadskortet etter kor mange soner det blir køyrt i. Totalt er det 136 bussoner i Rogaland.
Store forskjellar
Held du deg innanfor berre ei sone må du betala 405 kroner, mens du må ut med 685 kroner for å køyra kollektivt i fem soner. Treng du fleire soner blir det endå dyrare.
Skal du for eksempel frå Stavanger sentrum til Sandnes sentrum treng du ein billett som er gyldig i tre soner.
– Studentkortet bør bli sonefritt eller så må sonene bli gjort mykje større. Dette for å gjera det enklare for studentar å reisa med buss. I dag fryktar eg sonesystemet gjer at studentar vel vekk bussen, seier Lunde.
- LES OGSÅ:
- LES OGSÅ:
Blir avgjort i fylkestinget
– Men kan det ikkje vera logisk at dei som reiser lengst betalar meir for månadskort enn dei som reiser over kortare avstandar?
– Me i Venstre ønsker at det skal vera enkelt og billeg for alle å ta bussen. Då treng me å forbetra sonesystemet og ha eit rimeleg tilbod for alle, meiner Lunde.
Styret i Kolumbus har alt vedtatt at pris- og sonestrukturen bør bli forenkla. Kollektivselskapet meiner mellom anna at talet på soner bør reduserast frå 136 til fem.
Då takst- og sonesystemet var oppe til behandling i fylkestinget 9. juni stilte eit fleirtal av politikarane seg positive til forslaget om kraftig reduksjon i talet på soner.
Samtidig blir det peika på at det er viktig å få full oversikt over moglege økonomiske konsekvensar av ei slik endring. Kolumbus har bestilt ein kvalitetsrapport frå Norconsult for å finna ut av dette.
Dette skal fylkestinget ta stilling til 20. oktober.