Vil endre brukonstruksjon etter ekstremvêret

Fredag, dagen før ekstremvêret «Synne» slo inn for fullt, var NRK med Viggo Kristofferen i båt til Launes bru i Eigersund.

Kristoffersen er leiar for 60 hytteeigarar i Kjeøy velforeining i Eigersund, og dei har vore uroa for planane om den nye brua som skulle byggast.

– Når jernbaneverket skal til å setje inn ei ny bru, så ser me positivt på det. Men dei skal inn med eit nytt fundament, og då vil det stenga ytterlegare for vassgjennomstrøyminga, sa Kristoffersen på fredag.

Jernbaneverket hadde nemleg planar om å byggje ei ny bru med eit smalare og grunnare utløp enn i dag.

Men då ekstremvêret kom, viste det seg at dagens bru verken er brei eller djup nok til å ta unna dei store vassmengdene.

Hyttene på Kjeøy vart ståande under vatn, og jernbanebrua er framleis stengd.

• LES OGSÅ: Jærbanen stengd på ubestemt tid

Vil endra planane

Det har fått Jernbaneverket til å droppe dei opphavlege planane, og dei vil no byggje ei bru med breiare og djupare utløp.

– Me har gått vekk ifrå den opphavlege planen. Me kjem til å levera inn ein ny søknad, seier områdedirektør Stian Wesøy i Jernbaneverket.

Viggo Kristoffersen fekk seg dermed ein tidleg julepresang.

– Det synst jo me er veldig positivt, dersom det verkeleg skjer, seier Kristoffersen.

• LES OGSÅ: Skader for flere titalls millioner etter «Synne»

Gratis flaumsikring for kommunen

For Eigersund kommune betyr det dermed ei ny jernbanebru på Launes, med djupare grunn og breiare utløp, og eit flaumsikringstiltak som ikkje vil koste dei ei krone.

– Det er gledeleg at dei har vurdert ting på ny etter «Synne», og eg er glad for at dei har kome til den konklusjonen, seier ordførar i Eigersund, Odd Stangeland.