Nektar å godta plastforbod

Utsprenging av ein annan undersjøisk tunnel i Rogaland, Ryfast mellom Ryfylke og Stavanger, har ført store mengder plastsøppel ut i fjordsystemet i fylket.

Tunnelstein er dumpa i fyllingar i sjøen fleire stader. Den inneheld plastfiber som er brukt til å binde betong, og skyteledningar av plast brukt til å tenne på sprengladningar. Dei små plastbitane dukkar opp langs strandsona mange stader i fylket.

• Les også: Norske eksperter: Dette må til for å fjerne «det ekte havmonsteret»

– Plastsøppelet i denne posen fann eg langs jærkysten ved Kvernevik i Stavanger. Det fortel at plastfibrane blir tatt av havstraumar og frakta ut av Ryfylkebassenget, seier Alexander Rügert-Raustein, leiar av Miljøpartiet Dei Grøne i Randaberg.

Godtar ikkje forbod

Mykje plastavfall i strandsonen, som følge av dumping av tunnelmassar i sjøen i Rogaland, har gjort at Fylkesmannen har skjerpa vilkåra for den neste store tunnelutbygginga i området.

Når verdas lengste undersjøiske tunnel, på over 26 kilometer, skal sprengast ut under Boknafjorden, krev Fylkesmannen absolutt forbod mot plastsøppel.

• Les også: Plasten i havet ødelegger dyrelivet

Det er for mykje plast frå sprengingsarbeidet som flyt rundt i Ryfylkebassenget, men eit totalforbod mot plast, er å stilla altfor strenge krav, meiner prosjektleiar for Rogfast, Tor Geir Espedal.

– Desse krava må vera praktisk gjennomførbare, og etter vårt syn er dei ikkje det når Fylkesmannen krev at det skal vera null plast i tunnelmassane som skal fyllast ut i sjøen, seier Espedal.

Derfor har han anka vedtaket frå Fylkesmannen i Rogaland inn for Miljødirektoratet i Oslo.

Inga forståing frå MDG

– Eit slikt utsegn viser at vegvesenet ikkje har lært nokon ting av det som har skjedd i samband med utslepp av plastfiber og skyteledning i sjøen dei siste åra, seier Rügert-Raustein.

Han viser fram strandområdet Mekjarvik i Randaberg, der ein stor del av tunnelsteinen frå Rogfast skal lagrast. Massane skal dumpast i sjøen her på ned til 70 meters djup.

• Les også: 22-åring med storstilt plan for å fjerne havplasten

Det er så store mengder tunnelstein at det vil skape om lag 12 mål med nytt land i området når Rogfast-tunnelen står ferdig ein gong på 2020-talet.

– Eg er overbevist om at me har flinke nok ingeniørar til å løyse problemet med plastavfallet, seier den kommunale MDG-leiaren, og legg til:

– Og skulle det likevel visa seg å vera eit uløyseleg problem, så kan me seie nei til heile greia.

Endrar sprengingsmetoden

Prosjektleiinga i Rogfast set si lit til at Miljødirektoratet overprøver Fylkesmannen sitt vedtak.

Samstundes legg dei saka fram for Fylkesmannen ein gong til, der dei viser kva dei gjer for å få ned plastmengda, fortel Espedal.

Det handlar om ein ny skyteledning av metall, som søkk når den vert fylt ut i sjøen.

13/2: Prosjektleiar Tor Geir Espedal i Statens Vegvesen var i kapittel seks sitert på at "...eit totalforbod mot plastfiber er å stilla altfor strenge krav". Espedal brukte ordet "plast" ikkje "plastfiber". Dette er endra kl.0816.