Vegen blei nesten dobbelt så dyr – Vegvesenet og politikarane legg seg flate

– Det er tydeleg at ingen av partane har gjort ein god nok jobb. Ein har lent seg tilbake og tenkt at det er kontroll, seier fylkesordførar i Rogland, Marianne Chesak frå Ap.

I dag kom konsulentselskapet PwC med ein knusande rapport mot dei som har ansvar for å byggje, organisere og styre bompengane på Nord-Jæren.

Og det er spesielt eitt av prosjekta som får hard kritikk.

389 millionar kroner dyrare veg

Den 2,5 kilometer lange vegen mellom Skjæveland og Foss-Eikeland i Sandnes blei nær dobbelt så dyr frå første prognose i 2013 til han stod ferdig nå i sommar.

Vegen skulle kosta 492 millionar kroner, men prislappen blei 881 millionar kroner.

Ifølgje rapporten har det mangla styring, skikkeleg rapportering og kostnadskontroll i samanheng med bygginga.

– Vi har ikkje gjort ein god nok jobb. Det er berre å innrømme det, seier Tone Oppedal, som er avdelingsdirektør i Vegvesenet.

Delar av kritikken går ut på at dei ikkje har rapportert skikkeleg om kostnadsoverskridingar.

Ifølgje Oppedal tar Vegvesenet lærdom av dette.

– Det er noko vi allereie har begynt å sjå på. Korleis kan vi lære av dette og korleis kan vi faktisk gjere det betre, seier ho.

– Me var ikkje proaktive

Ifølgje rapporten var det også manglande kontroll i overgangen mellom den gamle bompengepakken til den nye Bymiljøpakken for Nord-Jæren.

Saka går fleire år tilbake, og dei fleste politikarane som sat i styringsgruppa blei skifta ut etter valet i 2019.

Dei nye lover å følgje betre med.

– De hadde ikkje kontroll i overgangen frå den gamle til den nye pakken?

– Nei, ein trudde det, men var ikkje proaktiv nok til å spørje etter meir informasjon. Dette viser at vi må ha ei meir offensiv rolle i styringsgruppene, seier fylkesordførar Chesak.

– Er det Vegvesenet som ikkje har gjort det dei skulle med å halde dykk som styringsgruppe oppdatert?

– Det blir for enkelt å seie. Eg meiner ingen har gjort det dei skulle. Det har svikta hos alle partar til tider, seier fylkesordføraren.