Varetektsfengsla for drapsforsøk

Kvinna som er sikta for drapsforsøk i Aksdal i Tysvær laurdag er varetektsfengsla i fire veker, melder politiet i ei pressemelding. To av vekene er med full isolasjon.

Bakgrunnen for varetektsfengslinga er at politiet fryktar bevis skal bli øydelagde. Retten har sagt seg einig i dette.

– Både sikta og fornærma er avhøyrd, i tillegg til fleire vitne. Politiet held fram arbeidet med å avhøyre fleire vitne, skriv politiadvokat Kristin Aasberg Ueland.

Politiet ynskjer ikkje sei noko om kva som er kome fram i avhøyra.

Den sikta kvinna skal vere i 40-åra og den fornærma ein mann i 50-åra. Den skadde mannen var medviten då han vart teken til sjukehus med helikopter og tilstanden skal ha vore stabil og utanfor livstrugande fare.