Ukrainsk samtidskunst skal fortelje verda om krigen

– Ein må ha noko å gjere for å ikkje gå heilt bananas, men det er også min måte å føle at eg gjer noko nyttig, seier Kateryna Taylor frå eit hotell oppe i fjella i Vest-Ukraina.

Ho har ikkje forlate heimlandet, men har kome seg vekk frå bombinga.

– Det har gått tre veker, og det verkar framleis uverkeleg. Eg kan ikkje tru at det skjer.

Kunsten hjelper

Men medan ho flyktar, blir kunstformidling brukt for å halde motet oppe. Og frå hotellrommet bidrar ho til å hjelpe landet sitt.

For Taylor jobbar som kurator. Nå har ho arrangert ei kunstutstilling med samtidskunstnarar frå heile Ukraina, som skal få vise fram sine tolkingar frå krigen.

– Eg har prøvd å hjelpe til som frivillig med det humanitære arbeidet, men følte meg ikkje like effektiv.

Så derfor bestemte ho seg for å leggje alle kreftene inn i det ho er aller best på. Kunsten.

Det er gruppa «Artists Support Ukraine» som leverer bilda. Gruppa blei først starta opp i 2014 etter Russland annekterte Krim-halvøya.

– Me har kunna vera aktive sidan dag éin, sidan gruppa allereie var der. Men nå ville eg blåse nytt liv i henne.

Personleg og annleis oppleving

Og det er på kulturhuset Sølvberget i Stavanger at ein kan oppleve kunsten, og sjå kva slags inntrykk krigen har gjort på innbyggarane.

Leiar for Sølvberget galleri, Hildegunn Birkeland, har brukt dei siste dagane på å pakke ut den rykande ferske kunsten frå Ukraina.

– Eg er imponert over kor flinke dei er til å snu seg når situasjonen er slik, seier Birkeland.

Ho tok sjølv kontakt med Taylor, og sender nå førespurnader vidare til samarbeidspartnarar. Målet er å få meir merksemd og støtte for prosjektet.

Og Birkeland meiner dette ikkje berre er viktig for ukrainarane sjølv.

– Kunsten kan bidra med å få oss menneske til å sjå og oppfatte. Dei er flinke til å formidle, og vil me skal stoppe opp og tenkje. Samtidskunsten er ein illustrasjon av tida me lever i.

Taylor forklarar at dette er veldig personleg og ein annleis oppleving for alle, men at nokon klarer å dokumentere det som skjer.

– Det er sjølvsagt gjennom deira personlege tolking, men likevel er det midt i krigsherjingane. For andre er det også ein sjanse til å seie ifrå og fortelje verda kva som skjer.