For Lyse blei toppen nådd 30. november, då målarane viste eit forbruk på 1148 megawatt på elektrisitetsnettet.
Rekorden er langt over det normale strømforbruket i november, og kan vere det høgste som er målt nokon gong, ifølgje leiar for driftssentralen i Lyse, Terje Nevland.
- Me har ikkje registrert høgare forbruk. Den statistikken me har går tilbake til 1997, og det er grunn til å tru at det ikkje har vore høgare tidlegare.
Rekordar over alle linjer
Det er ikkje berre Lyse som har merka kulda, også Haugaland kraft har registrert høgaste forbruk i november sidan i 2001. Heile 292 megawatt blei målt 30 november, fortel Gunn Margareth Lassesen, marknadssjef i Haugaland kraft.
Nevland i Lyse fortel at det høge strømforbruket ikkje er unikt for Rogaland.
- Me ser det same over heile landet, og det heng saman med den svært kalde månaden me har hatt.
Kulda svir på pengepungen
Rekorden er ikkje noko å jubla over for kundane, for rekordhøgt forbruk gjer rekordhøge prisar.
- Forbruk og pris heng saman. Ein må og sjå på vassmagasina for Norge totalt sett, som og er noko lågare enn normalt, seier Nevland.
Til no i år har netto import av strøm frå utlandet til Norge vore på rundt seks prosent. Om kulda held fram må strøm i større grad kjøpas frå utlandet, ifølgje Nevland.
- Norge har jo gode kablar til utlandet som vil hjelpa oss i ein sånn situasjon.
