Like før klokka fire i natt fekk politiet i Haugesund ein telefon på naudsambandet, men det var ingen som snakka i andre enden.
– Dette er ikkje uvanleg for oss. Som regel lyttar me litt på telefonen, og svært ofte er det ufrivillige oppringar som er gjort. Men i dette tilfellet så oppfatta operatøren at det kunne vera noko meir, seier operasjonsleiar i Haugaland og Sunnhordland politidistrikt, Knut Lyngholm.
Etter kvart kunne ein høyre ei gråtande kvinne og ein sint mann i den andre enden.
– På bakgrunn av dei lydane som dei etter kvart høyrde så valde politiet å sende ein patrulje til adressa som telefonen var registrert på, seier Lyngholm.
Kom med trugslar
Innringaren viste seg å vera ei kvinne i 20-åra på Karmøy. Ein mann var på besøk hos henne, men han var rusa og oppførte seg trugande mot kvinna.
Då kvinna ba han om å gå frå bustaden hennar, vart han sint og truga med å øydelegge inventaret i huset og med at han skulle banke henne opp.
Men politiet kom fram til staden før situasjonen utvikla seg til noko meir.
– Då politiet kom til staden vart mannen pågripen og sett i varetekt, seier Lyngholm.
Mannen hadde ein tablett ecstacy på seg då han vart arrestert og han er mistenkt for både å ha vore rusa på alkohol og narkotika.
Unngjekk ein farleg situasjon
– Kva hadde det å seia at operatøren oppfatta at kvinna var truga?
– Det er vanskeleg å spå. Men det ville i i alle fall blitt ein situasjon, for det var ein trugselsituasjon. Det er vanskeleg å veta kva som ligg i enden av ein slik situasjon, men heldigvis så klarte me å unngå det, seier Lyngholm.
Mannen som no sitt i varetekt er ein kjenning av politiet.
