No er det seglskutefest i Sirevåg!

Anne Berit Berge Ims, rådmann i Hå kommune, er frå seg av begeistring for at seglskutene som deltek i Tall Ships Races tek turen innom Sirevåg under årets seglas.

– Dette er svære greier! Me har gleda oss lenge til å invitera heile regionen til vakre, vesle Sirevåg. Det blir utruleg kjekt, seier ho entusiastisk.

• LES OGSÅ: Bli med seglskutene inn Geirangerfjorden

– Som om Kaptein Sabeltann segla inn

Allereie i går kveld kom den første båten, russiske Shtandart inn til hamn, og det gjekk ikkje stille for seg.

– Det var eit syn av dimensjonar. Han kom med salutt, så det var akkurat som å få Kaptein Sabeltann inn i Sirevåg. Den båten skal ut ein tur i dag, og skal ha salutt når han kjem inn att, så det gler me oss veldig til, seier Svein Arve Nygård i komiteen.

• LES OGSÅ: – Det er veldig koselig å bidra med bilder

Håpar på 3000

I løpet av onsdagen kjem det tre skip til, så totalt fire skip skal vera med på å laga folkefest i Sirevåg i dag.

– I Aalborg i Danmark var det for fire år sidan 700.000 menneske. Får me så mange blir det nok kaotisk, men får me ein prosent av det, så blir me veldig nøgde. Me har vel rekna med eit par-tre tusen besøkjande. Me trur at dette toppar det meste som har vore i Hå, og i alle fall i Sirevåg, seier Svein Høyland (Sp) i festkomiteen.