Stor interesse for gatekunst i Stavanger

Norges største gatekunstfestival, Nuart, opna laurdag på Tou Scene i Stavanger for 16. gong.

Under festivalen jobbar gatekunstnarar frå heile verda, oftast med spraymåling og sjablongar på husveggar og næringsbygg.

• LES OGSÅ: Gatekunst må ikke fredes
• LES OGSÅ: – Gatekunst er blitt den nye folkekunsten

100 verk

I år er resultatet tett opp til 100 verk som folk fritt kan studera nærare i Stavanger.

– Opninga var utseld og på gatekunstvandringa i dag deltok om lag 450 personar. Dette viser at gatekunst er veldig populært og interessa er aukande, fortel dagleg leiar for Nuart-festivalen, James Finucane.

Gatekunstvandringa under festivalen går frå Tou Scene og rundt Storhaug, og fokuserer på dei nye kunstverka som er laga for Nuart-festivalen 2016. Vandringa søndag var ein del av festivalen og derfor gratis.

Ei av dei som deltok var Eli Stangeland.

– Eg forventar å sjå nye, spanande ting og til å diskutera kunsten, seier ho.

• LES OGSÅ: Har satt verdensrekord i gatekunst
• LES OGSÅ: Vegvesenet endrar praksis: Vil opna opp for gatekunst

Nye sjansar

Denne veka fekk gatekunsten kritikk for å vera kjedeleg og kommersiell. Det uroar ikkje kunstinteresserte Stangeland.

– Eg er ikkje uroa for ein tannlaus kunst. Kunsten vil alltid engasjera og det fantastiske med gatekunst er at folk som aldri går på galleri får sett kunst, meiner ho.

Fekk du ikkje med deg den guida gatekunstvandringa søndag, har du sjansen til guida tur kvar søndag seinare i haust til kunstverka på Storhaug.

Det finst også tilbod om guida kunstvandringa i Stavanger sentrum kvar laurdag framover.