Over tusen tablettar med narkotisk stoff, samt hundrevis av LSD-drypp, har blitt beslaglagt dei siste vekene.
Tollarar på Postens østlandsterminal ved Oslo lufthavn kan telje over 1300 piller og meir enn 200 LSD-dosar.
Desse skulle alle til ulike adresser i Rogaland, melder etaten på Twitter.
Oppdaga ved rutinesjekk
Den eine pakken var kategorisert som «beauty product» og hadde i seg over 1000 tablettar. Pakken kom frå England.
– Beslaga blei gjort ved ein rutinekontroll, seier tolloverinspektør Heidi Eriksen i Tolletaten.
Dei to andre sendingane inneheldt nokre hundre dosar ecstasy og LSD. Det eine brevet kom frå Nederland og skulle til ein 24 år gammal mann i Rogaland.
Tyder på «business»
– Dette blir vurdert som for stor mengde til eigen bruk, seier Heidi Eriksen.
Overinspektøren vurderer storleiken på beslaget som «i øvre sjikt», men ikkje heilt uvanleg.
No blir forholdet meldt av Tolletaten, og skal etterforskast vidare av politiet.