– Det er heilt forferdeleg. Eg må jo gå inn og lukka alle vindauga, seier Sissel Strand.
Nabolaget hennar under Risøybrua i Haugesund sentrum har vore prega av forsøpling og forfall i mange år, men i det siste har problemet blitt mykje verre.
Med eit nabohus under oppussing og andre som har kasta boss i området, har sommaren til tider vore grufull.
– Når det har vore over tretti grader ute og det ligg mykje hushaldningsavfall og kosar seg, så blir lukta heilt forferdeleg, seier Strand.
Artikkelen held fram under bilete
Vil rydde opp
Etter at Strand, gjennom et lesarinnlegg i Haugesunds Avis på laurdag, inviterte ordføraren på terrassen for å sjå på problemet, kom Petter Steen med gode nyheiter i føremiddag.
– Huseigaren er ekstremt samarbeidsvillig, har eg fått tilbakemelding om i dag. Dei skal no rydda det som er. Og me skal sørga for at det kjem folk veldig kjapt for å sikre skrenta der borte, sa ordføraren til Strand.
Steen lovar også at kommunen skal rydde det offentlege området under brua. I tillegg ser han for seg ei oppgradering.
– Eg tenker me skal sjå på heile området her, og i den prosessen vil me gjerne ha med grunneigarane.
Og det er Sissel Strand godt nøgd med. Ho serverte wienerbrød til ordføraren etter omvisinga.