Det var for å hindra at bevis gjekk tapt, og for å sikra forklaringa til Helge Solum Larsen at politiet laurdag arresterte den tidlegare nestleiaren i Venstre.
- Les òg:
- BAKGRUNN: Alt om saka
Ute frå arresten
Nå fortel politiadvokat Elisabeth Rød i Haugaland og Sunnhordland politidistrikt at Solum Larsen er sett fri:
– Sidan det ikkje lenger er fare for at bevis kan gå tapt, har me nå sett Solum Larsen fri, seier Rød.
Etter valdtektsskuldingane mot Solum Larsen i byrjinga av februar blei han innlagd på psykiatrisk sjukehus. Han blei laurdag utskriven frå sjukehuset i Stavanger, og pågripen av politiet. Etter dette har han sitje i avhøyr i Haugesund:
Endrar ikkje siktinga
– Han held oppe den tidlegare forklaringa si, og har utdjupa dette. Avhøyra har vore ryddige og greie, seier politiadvokaten.
Solum Larsen nektar for å ha valdteke jenta, men innrømmar at dei har hatt sex.
– Har det kome fram noko i avhøyra som gjer at siktinga blir endra?
– Siktinga vil ikkje bli endra i dag, nei.
– Glad for å ha fått forklart seg
Ifølgje forsvarar til Helge Solum Larsen, Inger Marie Sunde, er han glad for at han har fått forklart seg, men han skal framleis vera sliten.
– Det er ikkje aktuelt for Solum Larsen å uttala seg om sjølve saka til pressa, og han vil heller ikkje uttala seg om helsa eller liknande nå, seier Sunde.
Ho skriv i ei pressemelding at Solum Larsen ber om fred for å kunna konsentrera seg om familien sin og for øvrig koma til hektene.
Ho seier at det var Solum Larsen som skreiv seg sjølv ut frå sjukehuset laurdag, etter avtale med politiet.
