– Kan bety nytt liv for mange gamle løer

– Det finst fleire hundre gamle løer i Distrikts-Noreg, som berre står for nedfall. Nå forventar eg at det skal bli lettare for folk å starta opp drift i desse løene, sjølv om det ikkje er landbruksdrift, seier Ole Ueland, som er ordførar i Sola kommune.

Han har nyleg fått gladmelding frå regjeringa om at ei bedrift med namn «Sola helsefarm», bør få halda fram drifta si i ei løe, som eigentleg er regulert til landbruk.

• Les òg: Ingen vet hva de skal gjøre med hundrevis av tomme låver
• Les òg: Ber Listhaug åpne for nytt liv i nedlagte låver

– Me er kjempeglade

Det er i eit brev frå kommunal- og moderniseringsdepartementet det kjem fram at landbruksdepartementet stiller seg bak vidare drift av Sola Helsefarm. Dei meiner endringa ikkje får vesentlege konsekvensar for landbruket i området. I tillegg er dei positive til at gamle driftsbygg kan brukast til andre ting enn jordbruk.

– Det er flott at me har ei regjering som lyttar på oss som lokalpolitikarar. Me har fleire gonger gitt løyve til at bedrifta kunne drive i løa, men det var Fylkesmannen som sa nei. Nå forventar eg at Fylkesmannen prioriterer denne saka, og at dei godkjennar vidare drift, seier Ueland.

Det var i november i fjor helsebedrifta fekk beskjed frå Fylkesmannen om at dei måtte stenga ned, på grunn av at området der løa låg var regulert til landbruk. Nå er dagleg leiar, Wenche Milas, letta.

• Les òg: Kroken på døren for Sola helsefarm

– Me er kjempeglade for den meldinga som kom. Nå håper me at me kan halda fram som før, og i tillegg utvida, seier Milas til NRK.no.

• Les òg: Tomme løer får nytt liv

Bør endra praksisen

Ole Ueland kjenner til at det er fleire andre som sit på gjerde i kommunen hans med driftsbygg, som dei vil ha ny verksemd i. Han oppmodar dei om å søka.

– Me i kommunen skal behandla søknadane positivt, så lenge det ikkje er noko landbruket tar skade av, seier han.

Han meiner at brevet som i dag kom bør skapa presedens for nye søkarar.