– Me har bestemt oss for å ikkje halda fram med julelys på Ullandhaug. Årsaka er at det er ei ressurskrevjande og kostbar oppgåve, skriv informasjonssjef Magnus Line i Telenor, til NRK.
Telenor er selskapet bak julelysordninga.
Det var i november 2001 ordføraren i Stavanger fekk brev frå Anja Ariel Tørnes Brekka. Ho var fem år og skulle så gjerne sett at det var lys på Ullandhaugtårnet.
Ordføraren tok kontakt med Telenor. Dei synst det var ein lys idé, og same år blei julelysa tent for første gong.
Lysa blir øydelagde
Tårnet, som ragar 199 meter over havet, er synleg både på Jæren og i Ryfylke. Dermed har lysa skapt julestemning for tusenvis.
– Vind og ising øydelegg lysa, og me må derfor kjøpa nye lys omtrent annakvart år. I år kunne me ikkje bruka lysa frå i fjor. Då meiner me tida er moden for å slutta, opplyser Line i Telenor.
Den fem år gamle jenta er i dag 22 og bur i Tromsø. I 2011 gleda ho seg over tiårsjubileet for lysa. I dag er Anja Ariel Tørnes Brekke lei seg.
– Så trist, er hennar første reaksjon når NRK fortel henne nyheita.
– Men eg skjønner jo at det alltid har vore eit overskotsprosjekt. Samtidig er det jo viktig med ting som kan lysa opp kvardagen litt.
Ho håpar difor at Stavanger vil stilla opp og likevel sikra julelysa.
– Telenor kan jo starta ein innsamlingsaksjon, og slik kan lysa bli finansierte i fellesskap. Eg er med, seier ho.
Folk reagerer på mørklagt tårn
Turgåarar NRK trefte ved Ullandhaugtårnet laurdag reagerte ganske likt Tørnes Brekke.
– Det er litt trist at tradisjonen er slutt. Det har vore eit lysglimt på veg til jobb når det er mørkt og trist, seier Nora Koksvik.
– Eg synst det litt dumt at det ikkje lenger blir lys. Me bur i Sandnes og ser lysa derfrå. Det synst eg er flott, seier Emil Bruun-Olsen.
Marte Aasen er fersk student i Stavanger og hadde sett fram til julelysa i desember.
– Folk har sagt at lysa var fine, og heile kollektivet har gleda seg til dei skulle bli tent. Det er litt skuffande at det ikkje skjer.
Telenor forstår at folk i Stavanger reagerer.
– Me har forsøkt tidlegare å få med oss både kommunen og andre aktørar til å bidra i ein dugnad knytt til julelysa på Ullandhaug. Dessverre har ingen meldt sin interesse for å vera med, opplyser informasjonssjef Magnus Line i Telenor.
Ifølgje Line hadde det kosta mellom 100.000 og 150.000 kroner å ha lys på Ullandhaugtårnet i år, alt etter kor mange lyspærer som kan bli brukte på ny.