Hopp til innhold

Skate-NM: – Nivået er skyhøgt

Rullebrettveteran Fredrik Austbø (28) skryt av nivået på NM i skateboard i Stavanger – og ikkje minst NM-arenaen.

Skate NM Stavanger 2016
Foto: Ole Andreas Bø

– Denne parken er heilt «sinnssjuk». Det er kjekt å vera tilbake igjen i Stavanger, og sjølvsagt kjekt å delta på NM, seier Fredrik Austbø (28).

28-åringen er full av lovord om NM-arenaen; den nye skateparken på Tasta i Stavanger som blei opna tidlegare i sommar. Med sine 2700 kvadratmeter er den norges største.

– Veldig mange talent

Fredrik Austbø

Fredrik Austbø på plass under skate-NM.

Foto: Ole Andreas Bø

– Kva betyr denne parken for dei som skate i dag?

– Eg trur den betyr utruleg mykje. Eg hugsar då eg var «kid» og me hadde den gamle skateparken.

– Så korleis står det til med rekrutteringa?

– Det er veldig mange talent. Nivået er skyhøgt her på NM og der er superkult å sjå på. Det er også mange frå Stavanger og området rundt. Det er kult å sjå, seier 28-åringen.

– Skatepark i verdsklasse

Sjølv om Austbø har trappa ned satsinga, klarte han tredjeplass i Senior bowl i NM i helga. 28-åringen, som har vore aktiv både med snøbrett og rullebrett, studerer til dagleg Sports management på Idrettshøgskulen i Oslo.

– Det er ein heilt annan kvardag enn før, men utruleg gøy.

Austbø skryt av skatemiljøet i Stavanger som han meiner alltid har vore bra.

– Stavanger har vore skatehovudstaden lenge og det er mange bra yngre skatarar. Og denne parken på Tasta er absolutt i verdsklasse, ein av dei råaste parkane eg nokon gong har skata på, gliser 28-åringen.

Skate-NM blei avslutta laurdag etter litt vêrtrøbbel på fredag.

Her er alle vinnarane frå skate-NM i Stavanger 2016:

Senior street:

1. Gard Hvaara

2. Herman Stene

3. Karsten Kleppan

Junior street:

1. Jonas Carlsson

2. Petter Brunvatne

3. Simen Heggeland

Senior bowl:

1. Kevin Bækkel

2. Karsten Kleppan

3. Fredrik Austbø

Junior bowl:

1. Elias Nilsen

2. Jonas Carlsson

3. Petter Brunvatne

Jenter Street:

1. Tonje Pedersen

2. Snøfrid Vestli

3. Frida Steinbakk

Jenter miniramp:

1. Tonje Pedersen

2. Renate Stangvik

3. Anna Stagrun

Game og S.K. A. T. E:

Michael Sommer