Nytt tiltak skal hjelpa norske prostituerte ut av prostitusjonen

– Eg blei redd, paranoid, utrygg og det var fleire ting som gjorde at eg merka eg trong hjelp, seier Alice Viola frå Danmark om livet sitt som prostituert.

Snakkar om prostitusjonen

I dag er ho ferdig med å selja sex, og ho var ei av initiativtakarane til behandlingstilbodet Svanegrupper, som nå har kome til Stavanger. Her er eitt av poenga at dei skal setja ord på det det handlar om, nemleg prostitusjon.

• Les og sjå video: Fordobling i antall prostituerte
• Les òg: Dømt for vold mot prostituerte

– Mange prostituerte kan oppleva at dei går i behandling for angst og depresjon, problem i parforhold eller problem med relasjonen til barna sine, utan at det blir snakka om at dei faktisk prostituerer seg, seier Viola.

Ho meiner at dersom prostitusjonen er eit tabu i behandlinga, vil berre symptoma og ikkje årsaka bli behandla. Poenget med Svanegrupper er at ein gjennom vekentlege samlingar er open rundt prostitusjonen.

Reservert norsktalande

Men når ein i Rogaland gjennom Helse Stavanger og Universitetet i Stavanger nå startar opp med prosjektet, er det reservert dei som kan snakka norsk.

Dette trass i at Stavanger har fleire titals prostituerte frå Nigeria, og at ein på «innemarknaden» har om lag 200 prostituerte frå 19 ulike nasjonar:

– Nå går me i gang med dei som snakkar norsk. Eg er trygg på at når me byrjar å få erfaring vil tilbodet også koma på engelsk, seier varaordførar i Stavanger Bjørg Tysdal-Moe (KrF).

• Les òg: Eskortepiker trekkjer til distrikta
• Les òg: – Marked for mannlig prostitusjon
• Les òg: Flere prostituerte i Oslo

Ho er ei av initiativtakarane og gler seg over den nye gruppa. Ho seier at dette vil bli det første skikkelege hjelpetiltaket for å få prostituerte i Rogaland ut av prostitusjonen, og halda dei der:

– Dei som har prostitusjonserfaring, og som vil ut av denne, har fram til nå ikkje hatt ei gruppe som passar for dei, seier Tysdal-Moe.

Vil forska på samanheng med seksuelle overgrep

I tillegg vil UiS bruka innsamla informasjon frå Svanegrupper, som forskingsdata for å finna ut om det finst ein samanhengen mellom seksuelle overgrep og prostitusjon.

Forsking frå Island og Danmark viser at det finst ein samanheng. Men slike studiar har aldri blitt gjort i Norge.

Anne Kristin Bruns, prosjektleiar ved UiS seier at erfaringar i Norge også tilseier at prostituerte ofte har vore utsett for seksuelle overgrep i barne- og ungdomstida.

• Slik kontaktar du Svanegrupper (ekstern lenke)