I denne barnehagen forsvann vikarane

– Kvart barn vart sett i mykje større grad enn før, seier leiar Monica Kapstad.

Dei to siste åra har Sandvikveien barnehage i Stavanger hatt fleire tilsette enn normalt. Barnehagen var med på eit pilotprosjekt, med mål om å få ned sjukefråværet.

Den nye bemanningsnorma krev at det skal vere ein vaksen på seks store barn og ein vaksen på tre små barn.

Men i Sandvikveien fekk dei ein vaksen på fem store, og ein vaksen på to små.

Halverte fråværet

– Vi sette inn tiltak tidlegare òg, men no kunne vi gjere det med ein gong. Vi var nok vaksne til det, fortel Kapstad.

På to år vart sjukefråværet i barnehagen nesten halvert – frå 9,4 til 5,5 prosent.

I 2018 kom barnehagane i landet på førsteplass av alle sektorar i kommunane med eit sjukefråvær på 12 prosent, ifølge Kommunesektorens organisasjon (KS). Sandvikveien ligg under landssnittet for alle yrke etter pilotprosjektet.

– Det var ein stabil kvardag med gode rutinar. Det var lite fråvær, og vi brukte ikkje vikarar.

Høgare standard

Men no kjem det dårlege samvitet blant dei tilsette sigande.

– Vi merkar forskjell no som vi er tilbake til vanleg bemanning. Fleire i personalet kjenner på tanken; «har eg gitt alle barna det eg veit at dei har behov for».

Det har òg vorte meir sjukdom, og vikarane er tilbake.

– Men det eg merkar det mest på, er at personalet er meir stressa. Det kan vere overgangen frå å verkeleg ha god tid til kvart barn, og så plutseleg ikkje ha det lenger.

Kostbar

I Stavanger krev tilsvarande bemanning i alle dei kommunale barnehagane 290 nye tilsette. Det svarer til rundt 120 millionar kroner når vikarutgiftene er trekt frå. Styreleiar Kapstad meiner likevel dette er ei god investering.

– Du kan ikkje måle det i kroner og øre no, men vi veit alle tiltak som blir sette inn før barna byrjar på skulen har mykje større effekt.

– Og det kostar å reparere. Det er ikkje alt som kan reparerast heller, utdjupar Kapstad.

Stavanger går føre?

Den nye leiar for oppvekst og utdanning i Stavanger, Eirik Faret Sakariassen (SV), seier han ønsker å vidareføre prosjektet.

– Eit av dei store måla for fleirtalet er å redusere sjukefråværet.

Også på sjukeheimen har kommunen hatt eit liknande prosjekt, med same utfall.

– Det er eit veldig viktig signal. Men regjeringa burde òg satse på dette ved å gi midlar til kommunane, slik at vi kan auke bemanninga.

– Er dette ei samfunnsøkonomisk langsiktig investering?

– Eg meiner det. Å investere i barn er veldig viktig, fordi det er lønnsamt. Ein god barndom var heile livet ut.

Kommunen sin ansvar

Statssekretær i Kunnskapsdepartementet, Julie Midtgarden Remen (H), meiner Stavanger er til inspirasjon for fleire kommunar. Men seier at det er kommunen som skal sørge for god nok bemanning, ikkje regjeringa.

– Måten dei har valt å jobbe på her gir tett og riktig oppfølging av barna, og i tillegg mindre sjukefråvær. Dette viser at kommunen har tatt ansvaret sitt, seier Remen.

– Er Kunnskapsdepartementet villig til å sjå på moglegheita for å auke grunnbemanninga ytterlegare?

– Pilotprosjektet viser at det er mogleg for kommunane å få til meir bemanning innanfor dagens regelverk. Staten på si side har sørgd for eit minstekrav.