– Det er ei stor oppleving å delta her, det er veldig morosamt. Og så er det kult at så mange har kome hit, seier Eivind Olav Risting.
Han er ein av 414 barn og unge i alderen seks til 25 år som i helga er samla til NM i sjakk for barn og ungdom på Forus i Stavanger.
- LES OGSÅ:
- LES OGSÅ:
«Magnus Carlsen-effekten»
Aldri før har så mange deltatt i sjakk-NM for barn og unge. Den førre rekorden skriv seg frå 2003. Då samla det årlege arrangementet 325 deltakarar i Sandnes.
– Arrangementet har 40 års historie, så me er veldig stolte. Dette er nesten hundre fleire deltakarar enn førre rekord, seier Petter Fossan i arrangementskomiteen for NM.
– Er det Magnus Carlsen-effekten eller andre ting som gjer at interessa er så stor?
– Ein av grunnane er nok Magnus Carlsen. Det andre er at arrangementet er i Rogaland. Rogaland er området i landet med størst sjakkinteresse ved sidan av Oslo. Me har mange medlemmer og stor interesse for sjakk, seier Fossan, som også er leiar i Stavanger Sjakklubb Ungdom.
(Artikkelen held fram under biletgalleriet).
Store ambisjonar
Og det står ikkje på ambisjonane til dei unge sjakkspirene.
– Målet mitt er å komma over 2000 i rating og bli det som blir kalla meisterspelar, seier Benjamin Fossan (14) frå Stavanger Sjakklubb.
– Bli du inspirert av dei gode prestasjonane til Magnus Carlsen i VM?
– Det er klart han inspirerer når han gjer det så bra. Eg spelar i klubben min kvar onsdag, i tillegg til heime på PC. Under NM er det kjekt å spela mot folk på min eigen alder.
Også klubbkamerat Leo Andreas Giske Vatnestrøm (14) vil bli ein god sjakkspelar.
– Ambisjonane er å bli stormeister. Eg må trena ein del for å klara det, seier Leo, som verkeleg fekk interessa for sjakk for to år sidan.
– Mine planar er først og fremst og gjera eit godt resultat her og så få ein sjakktittel snart, seier Eivind Olav Risting.
- LES OGSÅ:
- LES OGSÅ:
Stolte foreldre
Men det er ikkje berre barna og ungdommane som gler seg over den aukande sjakkinteressa. Også foreldra på NM i Stavanger set pris på sjakkfeberen i landet vårt.
– Det er veldig gøy med aukande sjakkinteresse. Det er gøy at sjakken har fått litt status og medvind. Eg har òg tru på at sjakk er ei sunn interesse å driva på med, seier Jens Kristoffersen, far til ein av deltakarane.
– Dette er eit veldig flott arrangement. Min yngste son som deltar er fem år. Han tok sine første NM-poeng i dag, så nå blir det feiring med brus, legg Øystein Johansen Sandø til.
