Drygt 4000 har meldt seg på årets Nordsjøritt, som går 91 km frå Egersund til Sandnes.
Og dei angrar seg neppe. Det er nemleg draumeforhold: Rundt 20 grader, sol og medvind.
Det er også mogleg å sykla halve distansen, og så blir det arrangert eigne ritt for barn, ungdom og familiar.
Ørjan Frøiland frå Sandnes sykkelklubb kom først i mål i Nordsjørittet på tida 02.41,46. Dermed sikra han seg sin aller første siger i rittet. I fjor blei han nummer 5.
– Det var heilt konge. Dette har eg venta på, sa han etter målgang.
Iren Kristin Eikemo frå Bogafjell sykkelklubb blei beste kvinne i Nordsjørittet med tida 2.59,47.
– I dag tok eg endeleg sigeren. Det følast heilt fantastisk, sa ho etter målgang.
Gunn-Rita Dahle Flesjå vann kvinneklassen i Nordsjørittet sitt MTB Marathon på 118 km.
Dagleg leiar i Nordsjørittet, Siri Ommedal, seier til NRK i 14-tida laurdag at arrangementet har gått fint, sjølv om det alltid blir nokre skader når så mange syklistar er i aksjon.
– Det har stort sett gått veldig fint. Men det er varmt og mange er tørste og har krampe når dei kjem i mål. Likevel er folk stort sett fornøgde, seier Ommedal.
