– Det var fleire som betalte med store setlar og som ikkje ville ha vekslepengar. Dette var ei sak dei ville støtta opp om.
Det seier Kjetil Våge, ein av initiativtakarane til støtteaksjonen for dei to søstrene Hawjin (11) og Nawjin (9). Den yngste av dei to spelar på fotball-laget, der dottera til Våge er med.
– Då eg fekk vita at familien hadde fått beskjed om å reise frå landet, så tenkte eg og fleire andre i fotball-laget, at dette burde lagvenninnene engasjere seg i, seier Våge.
Les også:
Ingen fleire sjansar til å anke
Naser Alinejad og Nahmil Razulpool kom frå Iran til Noreg i 2003, og busette seg i Haugesund. Dei to døtrene deira blei begge fødd i byen.
Rett etter påske fekk dei nei på ein siste søknad om å få bli, og i dette avslagsbrevet frå Utlendingsnemnda (UNE), fekk familien beskjed om å reise frå landet. Dei fekk alt i 2006 eit endeleg avslag, men har klart å utsetje utreisa til nå.
Rettssak er siste moglegheit
Det som står att er at familien kan gå til rettssak mot UNE sitt vedtak, men det kjem til å kosta 160 000 kroner. Til nå har gode vener samla inn om lag 20 000, og Vardjentene sin innsats på laurdag føremiddag auka kontoen med om lag 7 000 nye kroner.
Det er Astri Pedersen frå Haugesund, som har stilt seg i spissen for innsamlinga. Ho kom med denne meldinga på Facebook på laurdag ettermiddag:
– Flinke vardjenter sørgde for over 7000,-kr på kafeen sin i dag til inntekt for vennene sine Hawjin og Nawjin Flott måte å vise at en bryr seg på
Tusen takk til dere alle og til dere som bakte.