Politiet fekk melding om hendinga dei kallar «sjokkbrekk» litt før klokka 04.30. Dei har rykka ut med alle tilgjengelege ressursar, skriv dei på Twitter.
Fotobutikken ligg i Lars Hertervigs gate i sentrum. Ingen var der då politiet kom fram. Igjen på staden sto bilen som blei brukt til å rygge inn butikkvindauget. Med motoren som gjekk.
– Det er eit litt vanskeleg søk, seier politiet sin innsatsleiar, Stein Torjussen.
Han seier politiet svært gjerne vil snakke med folk som var i sentrum i den tida innbrotet skjedde.
Har fått vitneskildring
Eit vitne såg to maskerte menn springe frå staden. Ifølgje Torjussen har vitnet komme med ei skildring av korleis dei såg ut.
Det er ikkje kjent kor store verdiar som er borte frå butikken. Men at det er mykje, er Arnt Ove Jøsang, som driv butikken, ikkje i tvil om.
– Eg kan sjå frå utsida at dei har vald dei dyre skåpa, seier han.
Jøsang anslår at verdiar for opp mot to millionar kroner kan vere borte.
Politiet ser ikkje vekk frå at dei kan ha hatt ein fluktbil ståande i nærleiken. Det gjer heller ikkje Jøsang. Han trur tjuvane må ha hatt ein annan bil som dei har fylt opp med varer før dei har stukke frå staden.
– Ingenting kan stoppe dei
Ei liknande hending skjedde i 2016. Då blei alle hyllene tømt for dyrt fotoutstyr, og eigaren var fortvila. Den gongen skjedde innbrotet ved 03-tida om natta, og få dagar etter eit brekk av same typen hos ein elektronikkbutikk i same område.
– Eg trur ikkje ein kan sikre seg mot slikt. Når dei køyrer bil inn i butikken, er det ingenting som kan stoppe dei, seier han.
Ifølgje Jøsang fant politiet aldri ut kven som sto bak innbrotet for snautt fire år sidan.