Opplagstala for stavangerbaserte Rogalands Avis er ikkje hyggeleg lesnad for sjefredaktør Bjørn G. Sæbø. I reine tal viser dei ein tilbakegang frå 7709 aviser i 2013 til 5952 aviser i fjor. Det er ein nedgang på mellom 22 og 23 prosent.
Avis tre dagar i veka
Sjefredaktøren meiner likevel at dei ikkje hadde noko val.
– Det var enten å skjera ned kostnadane kraftig eller å gå konkurs, seier Bjørn G. Sæbø.
Det positive som skjedde var at dei kutta kostnadane så mykje, at Dagsavisa var viljug til å kjøpa dei opp på hausten i fjor, fortel sjefredaktøren.
Lesartala er stabile
Sæbø meiner også at ein foreløpig abonnementsauke på 500 hittil i 2015, viser at Rogalands Avis også skal fortsetje å gi ut avis i tida framover.
– Lesartala våre, samla på papir, pc og mobil, viser at dei er nokolunde stabile. Det er om lag 50 000, som les oss kvar dag. Problemet er å kunne samanlikna med tidlegare år. Fjoråret var for eksempel første året me målte mobilbruk, seier Sæbø.
Taper lesarar på Haugalandet
Haugesunds Avis har bak seg fleire vanskelege år, og nedgangen fortsette i 2014.
– Det positive er at nedgangen har stabilisert seg dei siste seks månadane, seier Arnstein Olaisen, ansvarleg konstituert redaktør i avisa.
Likevel må Olaisen sjå at talet på lesarar har gått ned frå 78 000 i 2013 til 72 000 i fjor. Den nedgangen i lesarar utgjer om lag 7.5%.
– Dette er ikkje noko nytt for oss. Me ser at me får stadig hardare konkurranse frå andre typar media, seier Olaisen.
Aftenbladet fortset nedgangen
Stavanger Aftenblad har ein nedgang i opplagstal både digitalt og på papir. Tala for 2014, viser ein reduksjon på 1.2 prosent frå året før, og endar på 58 544.
Når det gjeld lesartal, så går dei ned med 2 prosent. Det er til saman 214 000 personar, som les Aftenbladet på papir, pc og mobil, kvar dag.
Sjefredaktør Lars Helle er, det han sjølv karakteriserer som, "ganske nøgd" med 2014. Nedgangen har bremsa opp, utan at han seier at krisa er over.
– Dei siste åra har me mista like mykje inntekter som i finanskriseåra etter 2008, seier han. Berre med den forskjellen at det ikkje er finanskrise lengre og at dei fleste andre næringar gjer det veldig godt.
– Me er midt inne i ei omstilling som ennå kjem til å gå føre seg nokre år, seier Helle.