– Me har fått inn 32 tilbod i vår region. Og ein høg del av dei er i Rogaland, seier fungerande regiondirektør ved regionkontor Vest i UDI, Sissel Mehammer.
11. april hadde UDI innleveringsfrist for tilbod om drift av asylmottak med til saman 10 000 plassar.
Kommunar, organisasjonar og private har levert inn ulike tilbod om drift av mottak i alle landsdelar.
Totalt kom det inn tilbod om 15 600 plassar fordelt på 97 mottak. Ein stor del av desse tilboda kom frå Rogaland.
– Me ser veldig positivt på det. Me har jo tradisjonelt hatt ein del mottak i Rogaland, og me har hatt eit godt samarbeid med mange vertskommunar, seier Mehammer.
Nye aktørar vil drifte mottak
Abri Vekst, som i dag driftar landets største mottak på Forus i Stavanger, er blant aktørane som no ynskjer å drifte fleire. I tillegg er det også nye aktørar som har søkt om å få starte mottak.
Sissel Mehammer er fungerande regiondirektør ved regionkontor Vest i UDI.
Foto: Bård Siem / NRKEin ny aktør som har lagt inn mange tilbod er selskapet Humaq AS. UDI ser positivt på at nye selskap melder seg på.
– Me er glade for at det kjem nye aktørar inn på marknaden, fordi me treng mange nye mottaksplassar, seier Mehammer.
Blir avgjort om nokre veker
No skal regionkontora i UDI vurdera tilboda som har kome inn, før dei avgjer kven dei vil signere kontrakt med. UDI antar at det arbeidet vil ta nokre veker.
– Førebels er me så tidlege i prosessen at me berre har registrert dei tilboda som har kome inn. No vil me sjå på kven som er kvalifiserte til å gå vidare i konkurransen, og så vil det bli ein forhandlingsrunde før konkurransen blir avslutta, seier regiondirektøren.
– Kva vektlegg de når det skal avgjera kva tilbod de går for?
– Me vektlegger ulike sider ved kvaliteten på mottaksdrifta, og så vektlegger me prisen på mottaksplassane, seier Mehammer.
