I dag lanserte Røde Kors og Lerdal Medical sitt omfattande samarbeidsprosjekt «Førstehjelpskanalen». Prosjektet har som mål å få opp folk sin kunnskap om førstehjelp gjennom internett og TV-apparatet.
Mange har gamal kunnskap
– Dei siste målingane me har på folk sine kunnskapar om førstehjelp seier at mange er villige til å hjelpa, men dei sit på gamal kunnskap. Me er derfor urolege for at mange ikkje veit korleis dei skal hjelpa til, når ulukka er ute, seier Peter Meyer i Røde Kors.
Derfor håper dei at pedagogiske videoar og spel, som inneheld den nyaste kunnskapen, skal bli tatt godt imot.
– Her får folk svar på korleis me skal ta vare på kvarandre i det daglege, og når ulukka skjer. Det er også ein viktig kanal for dei som har småbarn, mange ulukker skjer i heimen, og foreldre lurer ofte på kva dei skal gjera når barna deira blir sjuke, seier Meyer.
På TV og nett
Kanalen er allereie å finna på Røde Kors og Lerdal sine nettsider, i tillegg til at dei som har Altibox-mottakar på TV-en sin kan sjå kanalen på denne frå og med måndag.
Meyer understrekar at kanalen ikkje er meint som ein erstattar for dei tradisjonelle kursa.
– Dette er både læring, men også teaser på at ein skal ønska å læra seg meir, og derfor gå på kurs med Røde Kors, seier han.
