Det er ikkje første gong i vinter familien Nybø må halda seg heime i den vesle bygda Lono denne vinteren. Heile 12 gonger har snøskred eller rasfare ført til at vegbommen har blitt senka i løpet av vinteren. Søskenparet Madli og Udmund Nybø har mista 14 skuledagar som følgje av den stengde vegen.
– Då kan me ikkje treffa venner og får heller ikkje gjort skulearbeid, seier Udmund.
– Og då blir me liggjande etter, seier søstera Madli.
«Småpengar»
På nabogarden er bonde Erik Inge Bakka sikker på kva som må til for å få ein sikker og påliteleg veg:
– Pengar på bordet.
Men Statens vegvesen har berre 3,5 millionar kroner til mindre utbetringar i denne perioden på Nasjonal Transportplan (NTP).
– Det ligg ikkje spesifikke rassikringsmidlar til denne strekninga. Det får me jobba vidare med inn mot neste NTP, seier Ivar Thorkildsen, seksjonsleiar Statens vegvesen.
– Rassikring må til
For at familien Nybø framleis skal kunna bu i den vesle bygda, må dei vera sikre på at dei kjem seg til og frå som dei vil.
– Eg trur nok det er rassikring som må til. Me håpar jo at det ikkje er slik dei komande vintrane, men me veit jo ikkje sikkert, seier Kati Nybø.