Turistattraksjonen Preikestolen er eit fjellplatå som ligg 604 meter over havet i Lysefjorden i Rogaland (arkivbilete).
Foto: Bjørn Olav Skjæveland / NRKLike før klokka 19 tysdag fekk politiet inn melding om to franske turistar, som ikkje kom seg ned frå Preikestolen i Lysefjorden i Ryfylke.
– Dei to turistane skal vera vêrfaste på sjølve Preikestolen. Dei er både kalde og blaute, sa redningsleiar, Nils Ole Sunde, ved Hovudredningssentralen på Sola (HRS) til NRK.no.
Mørke i tillegg til både vind og regn, gjorde leite- og redningsforholda vanskelegare.
HRS sende først ut eit Sea King-redningshelikopter, men dette måtte snu grunna vêret.
Dermed blei Norsk Folkehjelp i Strand og Forsand varsla, og dei sender redningsmannskap til fots.
– Det er ikkje gjort på ein augneblikk å koma seg opp til Preikestolen, så franskmenne må rekna med å venta nokre timar før dei får hjelp, sa Sunde i 20-tida.
Beredskapsansvarleg i Norsk Folkehjelp Strand og Forsand, Espen Brekke, seier at det gjekk greitt for redningsmannskapet å koma seg opp:
– Me har bra med utstyr, så det går bra å koma seg opp på Preikestolen trass det dårlege vêret. Det er heldigvis ikkje is, seier Brekke til NRK.no.
Klokka 21.15 melder politiet at redningsaksjonen har gått bra:
– Norsk Folkehjelp er på veg ned til Preikestolhytta med dei to turistane. Dei er kalde, men skal ikkje ha behov for tilsyn av lege, opplyser operasjonsleiar i Rogaland politidistrikt, Geir Gjesdal.
