– I løpet av dagen har eg fått fleire telefonar frå privatpersonar som seier at dei kan tilby leilegheiter til flyktningar frå Syria.
Det seier ein glad gruppeleiar for Venstre i Stavanger formannskap, Per A. Thorbjørnsen. Han kom med forslaget om at kommunen skulle ta imot 250 flyktningar frå Syria i løpet av 2015 og 2016.
Syriske flyktningar i Libanon.
Foto: Bilal Hussein / Ap– Det er FN som ber oss ta imot nokre personar som treng spesiell dekning, og det er flott at fleirtalet i formannskapet seier ja til det, seier Thorbjørnsen.
Krev at staten tar rekninga
– Føresetnaden er at staten tar på seg kostnadene dette fører med seg, slik som utgifter til norsk- og integreringskurs.
Det seier ordførar i Stavanger, Christine Sagen Helgø. Samstundes er ho klar på at dette skal kommunen forplikta seg til.
– Tar staten seg av betalinga, så skal kommunen ta seg av flyktningane, seier ho.
Betre å hjelpe i nærleiken
Framstegspartiet seier nei til forslaget om å ta imot 250 nye flyktningar frå Syria. Partiet minner om at kommunen tidlegare i år er beden om å auka mottaket frå 120 til 188 flyktningar i år og til 156 til neste år.
Sissel Stenberg argumenterte mot fleire flyktningar til Stavanger. Det gjorde også Leif Arne Moi Nilsen i Stavanger Frp.
Foto: Ingvald Nordmark / NRK– I tillegg er det slik at staten har løyva milliardbeløp til å hjelpa flyktningar i Syria. Og dei pengane hjelper veldig mange fleire dersom dei blir brukt i nabolanda, i staden for å henta flyktningane til Stavanger, seier Sissel Stenberg.
Seier ja til fleire
Arbeidarpartiet opnar også for å auke talet ut over 250.
– Dersom det forslaget kjem opp er det ikkje umogeleg at Ap seier ja til det, seier gruppeleiar Cecilie Bjelland.
