– Når me får påslag om 23 prosent auke. Me blir irriterte og rett og slett forbanna, som me seier i Nord-Norge, seier Ståle Mørch, dagleg leiar Dickens/Sjøhuset Skagen.
Han merkar veldig godt prisauken på titusenvis av kroner på uteområdet han disponerer.
– Ikkje diskutert dette
Det er administrasjonen i Stavanger kommune som har sendt ut prissjokkbrevet.
– Dette har ikkje blitt diskutert i den store handlings- og økonomiplanen som er vedteke, seier John Peter Hernes, kommunalråd (H) i Stavanger.
– Her ser me at det kjem eit påslag på 23 prosent, det er veldig mykje. At det er naturleg å ta ein ekstra runde for å sjå om det er riktig, det syns eg me skal gjera.
Litt galgenhumor
Mørch kan ikkje anna enn å le litt av situasjonen, og han kjem med eit aldri så lite forslag til kommunen.
– Kanskje me kunne fått til ei ordning med kommunen der me berre betalar på dei dagane det er sol og fint vêr, så hadde me vore nøgde. Men me må jo også betala for alle dei dårlege dagane også, smiler Mørch.
– Då må det nok vera veldig godt betalt for solskinsdagane for å få det til å gå rundt, svarar Hernes i kommunen lurt.
