– Det er ingen som har status som mistenkte, og det er førebels ikkje grunn til å tru at det har skjedd noko kriminelt. Men me etterforskar saka frå å kasta lys over kva som har skjedd, seier Per Gunnar Kvame som er politiførstebetjent ved Sandnes politistasjon.
- Les òg:
Det var i går klokka 18.55 politiet fekk melding brannen i eit lagerbygg i Jærveien i Sandnes sentrum. Ingen personar blei skadde, men bygget brann til grunnen medan brannvesenet konsentrerte seg om å sikra bygga rundt.
Fleire bilar blei også totalskadde i brannen, dette heng saman med at dei som leigde lokala brukte dei til å fiksa på bilar og at det ligg eit parkeringsanlegg like ved.
Fleire avhøyr
Nå blir saka etterforska av ei gruppe på fem frå politiet, i tillegg er dei i dialog med kriminalteknisk avdeling som etter kvart skal undersøka branntomta.
– Me tek ein del avhøyr nå av huseigar, dei som var på staden og andre vitne til brannen, seier Kvame.
Fleire av dei som var i lokalet då brannen starta snakkar ikkje norsk, så politiet må ha hjelp frå tolk i avhøyra. Dei vil finna ut kva type aktivitet som føregjekk der i går.
– Slik eg har forstått det så har det vore ein slags verkstad. Men me prøver nå å kasta lys over kva det var som føregjekk. Me håper at me får betre oversikt over dette utover dagen.
Branntomta vil stå ei stund til
Han legg til at åstadsundersøkingane ikkje vil skje med det første, slik at branntomta i Sandnes sentrum vil stå slik den er ei god stund til. Den er nå sperra av med sperreband.
– Me prøver å samla så mange opplysingar som me kan før me går inn på åstaden. Då blir det lettare å gjera dei rette undersøkingane, seier Kvame.