Ønskjer ikkje generell væpning av politiet

– Trugselbilete vi ser dagleg gjer det ikkje nødvendig å ha væpna politi til ei kvar tid. Eg meiner politiet har god nok tilgang på våpen med framskott lagring av våpen i patruljane, seier politimeister i Rogaland politidistrikt, Hans Vik.

Måndag kveld vart regjeringsplattforma presentert av partileiarane Erna Solberg og Siv Jensen. Politiet og justissektoren er eit av satsingsområda i erklæringa og den kommande regjeringa vil opne for generell væpning av politiet. Dei føreslår at politidistrikta sjølv kan avgjera om dei ynskjer ei generell væpning av politiet.

• LES: Vil ikkje ha væpna politi
• LES: Politimeister avviser regjeringas våpenforslag

– Nøgd med ordninga i dag

Likevel, i Rogaland får me truleg ikkje sjå væpna politi i gatene med det første. I dag ligg våpna og alt utstyret klart til bruk i patruljebilane, men i det dei går ut av bilen er ikkje lenger politiet væpna. Kun i ekstraordinære høve går politiet til væpna aksjon.

Politiets fellesforbund sa i fjor ja til generell væpning av politiet i Noreg. Men i Rogaland er fellesforbundet negative til at politiet skal bera våpen til dagleg.

– Som den nye regjeringa legg det opp er det opp til kvart eige distrikt å vurdera om dei treng det i den delen av landet der dei bur. Det synest eg er flott. Her i Rogaland er det ein førebels einigheit om at vi er godt nøgd med den ordninga vi har med våpen i stort sett alle politibilane og godt utstyr til mannskapa, seier leiaren Erlend Bjørnestad.

• LES: Stoltenberg-regjeringa ønsker ikkje væpna politi i Noreg
• LES: Kun ein bil klargjort for våpenoppbevaring

– Skal møta born med ei hand

Å seia nei til generell væpning av politiet handlar om å halde på sitt sivile preg, meiner politimeisteren.

– Ungar som vender seg til ein politimann eller kvinne skal møta ei hand i hoftehøgd, og ikkje ein pistol. Det er eit bilete, men det er viktig å ta vare på vårt sivile preg. Så lenge ikkje sikkerheita vår eller samfunnssikkerheita tilseier fast væpning meiner eg at det ikkje er nødvendig, seier Hans Vik.