Oljeprisen har gått ned frå 110 dollar i sommar, til 55 dollar i dag. Trass i dei alvorlege konsekvensane det medfører, i form av innsparing og færre arbeidsplassar, har den tidlegare olje- og energiministeren tru på framtida til olje- og gassindustrien.
– Eg har stor tru på omstillingsevna i næringa. Det har vore ein kostnadsutvikling dei siste åra, som etter mitt syn ikkje har vore berekraftig. Den treng me å få korrigert. Og nå er eg heilt sikkert på at både oljeselskap og leverandørindustrien har eit fokus på å levere både effektivt og godt, som dei ikkje har hatt i stor nok grad før.
- LES OGSÅ:
Prisen skal opp igjen
Borten Moe sitt grunnlag for å seie at oljeprisen skal opp igjen, er at ei halvering av prisen i løpet av det siste halvåret, fører til auka etterspørsel.
- LES OGSÅ:
I tillegg kuttar nå veldig mange selskap i investeringane sine, slik at det blir bora færre leitebrønnar og nye prosjekt blir utsett.
Etter Borten Moe si meining betyr det at oljeproduksjonen kjem til å gå ned.
På eitt eller anna tidspunkt kjem etterspørselen til å bli større enn tilbodet og då er det tid for prisauke, meiner han.
– Og har næringa då gjort jobben sin i mellomtida, så trur eg at norsk olje- og gass-næring kan koma styrka ut av dette her, og med ein sunnare kostnadsstruktur og auka effektivitet i botn.
Ein ny sjanse
– Betyr det at du ser på prisnedgangen som ein grei korreks for norsk oljeindustri?
– Det er tidleg å trekke den konklusjonen, for me har berre levd under dette prisregimet i relativt kort tid og me kjenner jo ikkje dei langsiktige konsekvensane, seier Borten Moe.
Likevel er han sikker på at det var behov for å få ned kostnadane og auke effektiviteten i bransjen. Det som nå har skjedd er ein sjanse til å byrja om igjen, seier Borten Moe:
– Eg er ikkje av dei som trur at dette er byrjinga på slutten på olje- og gassalderen i Norge, slik mange likar å snakke om. Eg trur heller det er ein sjanse til å byrja på nytt, kanskje i eit anna spor og kanskje også koma styrka ut av situasjonen på den andre sida.