– Eg synest det er ekkelt. Og eg vil ikkje ha det på klernå! Dette seier Lilly Eide i Tyrihans barnehage i Stavanger.
Ho står og kikkar inn på eit avstengt skog- og krattområde i barnehagen. Ein ukjent luseart har slått seg til i skogen i store mengder denne hausten.
Store mengder veps
– Det første me oppdaga her i sommar var at det var veldig mykje veps i ein del av skogen på området vårt. Og for nokre veker sidan såg me at det var nokre ukjente vesen som krøyp rundt på greinene.
Lillian Jensen Hein, pedagogisk leiar i Tyrihans barnehage på Mariero i Stavanger, fortel om det dei etter kvart har forstått er store lus, som heldt til på barnehageområdet.
– Eg trur ikkje det er bladlus, men kanskje heller barklus. Dei likar seg i alle fall på barken på trea, seier Jensen Hein.
Les også:
Øydelegg kleda til ungane
Problemet for barnehageleiinga er at ungane er glade i å klatra i trea, og når dei gjer det så kjem dei borti lusa og då tyt det ut eit fargestoff.
– Det ser ut som blodflekkar på kleda og flekkane går ikkje av i vask, fortel Jensen Hein.
Så ho har fått spørsmål frå foreldra om noko kan gjerast med luseplaga.
Veit ikkje kva type lus det er
– Eg klarer ikkje å seie kva art det er, slik på ståande fot. Det seier Ørjan Simonsen, som er insektekspert hos Fylkesmannen i Rogaland.
Men han er rimeleg sikker på at det er snakk om ein luseart.
– Det at tøyet blir farga raudt, det er vanleg blant desse bladlusa, seier Simonsen.
Les også:
Han seier at det er vanleg med bladlus også så seint på hausten som nå. Likevel så reknar han med at dei kalde nettene kjem til å ta knekken på lusa i løpet av vinteren.
– Men dei er store, det er sikkert og visst, avsluttar Simonsen.