Her skal syklistane ha prioritet

Raudfargen skal signalisera for bilistar at Møllegata i Stavanger er ei gate utanom det vanlege. Her er det nemleg syklistane som skal ha prioritet.

– Eg er veldig stolt. Me ligg ikkje så bra an samanlikna med dei andre storbyane i Noreg når det kjem til bruk av kollektivtransport, men nå er me først ute med sykkelveg, sa bystyrepolitikar frå Venstre, Per A. Thorbjørnsen, som fekk æra av å klippa snora i dag.

• Les òg: Stavanger får landets første sykkelprioriterte gate

Vanlege trafikkreglar

Ideen er henta frå Danmark og Nederland. Sjølv om gata er såkalla sykkelprioritert er det dei vanlege trafikkreglane som gjeld.

– Når bilistane ser den raude asfalten kjem dei til å tenka at nå er det syklistane som har den sjølvsagde forkøyrsretten, seier Thorbjørnsen, som også sa at dette berre er eit startskot for kva syklistane har i vente.

Det meste tyder ifølgje bystyrepolitikaren på at det kjem nye raude gater frå alle bydelane inn mot sentrum og dei store institusjonane i området.

– Slike prosjekt har me lov til å vera utolmodige med. Så må me ha meir tolmod når det kjem til sykkelstamveg langs motorvegen, seier Thorbjørnsen.

Saknar betre skilting

Trass mykje glede og jubel i Møllegata i dag var det også kritikarar å spora i publikum.

Nabo og bensinstasjonsinnehavar, Joar Skorpe, meiner at gata kan gi syklistar falsk tryggleik. Han meiner farlege situasjonar kan oppstå.

– Eg liker veldig godt ideen om ein sykkelprioritert veg, men eg er uroleg for manglande informasjon, seier Skorpe.

Han meiner at det burde bli sett opp skilt i tverrgatene, og at det skulle kome meir informasjon ut om kva ei sykkelprioritert gate er.

– Når syklistar høyrer at dette er ei sykkelprioritert gate tenker dei at det berre er å køyra på, men det er jo vanlege trafikkreglar som gjeld, seier han.

Thorbjørnsen er samd i at det kan bli litt forvirring i starten, men trur at det vil gå seg til.