Noregs Fiskarlag meiner at dumping av gruveavfall og andre industriutslepp på ny er i ferd med å bli ein alvorleg trussel mot miljøtilstanden i norske fjordar. Fiskarlaget skriv dette i eit sterkt kritisk brev til Miljøverndepartementet og Fiskeri- og kystdepartementet.
Bakgrunnen er fleire nye industriprosjekt, som kan føra til deponering av store mengder gruveavfall og utslepp av giftige kjemikalier. Fiskarlaget krev å bli tatt med på råd for å få innverknad på avgjerdene i slike saker.
Jøssingfjorden og Yrkjefjorden
Fiskarlaget er uroa over planane til Titania i Sokndal. Dei skal kanskje starta opp att deponering av gruveavfall i Dyngadjupet utanfor Jøssingfjord.
Også AF Decom Offshore si verksemd på Raunes i Nedre Vats i Vindafjord skapar uro hjå Fiskarlaget. Organisasjonen meiner verksemda kan føra til store utslepp av miljøgifter i Yrkjefjorden.
Denne fjorden blir hevda å vera ein svært viktig fiskefjord, og det blei i 2009 tatt cirka 20 000 tonn sild her. Noregs Fiskarlag har derfor stilt spørsmål ved om dette er rett område for å lokalisera eit større anlegg for opphogging av petroleums-installasjonar, heiter det i brevet.
Fiskarlaget ber no om eit møte med departementa for å drøfta dei problemstillingane som blir tatt opp i brevet.
