Det er Strandbuen.no som skriv at Naturvernforbundet i Strand har klaga inn den nye skulpturen «Solspeilet» som står på ein holme utanfor Jørpeland. Dei meiner den er bygd tre meter høgare enn det kommunen gav løyve til.
– Det er betre at Naturvernforbundet bruker tida på skikkelege naturvernsaker. Alt som er gjort er vedteke for snart to år sidan, seier Stian Heimlund Skjæveland til avisa.
Det er han som har bygd skulpturen som blei ferdigstilt for berre to veker sidan. Han har brukt tre år på å laga kunstverket, som har fått pengestøtte frå det lokale næringslivet.
- Les òg:
Ifølgje rådmannen blei det søkt om fem meter
NRK har ikkje fått fatt i Heimlund Skjæveland torsdag kveld, men ifølgje rådmannen i Strand kommune så er det hald i påstandane som kjem frå Naturvernforbundet. At det berre blei søkt om å reisa ein fem meter høg skulptur.
– Så vidt eg har fått bekrefta så blei det berre søkt om fem meter, så viss den er åtte meter så er det i strid med vedtaket, seier rådmann i Strand kommune, Jon Ola Syrstad til NRK.
Ifølgje Strandbuen så meiner Naturvernforbundet at kommunen nå må sørgja for at «Solspeilet» blir redusert til fem meter. Ifølgje rådmannen vil ikkje det skje med det same.
– I prinsippet så må tiltakshavar søkja om endring av dispensasjonen. Så må kommunen vurdera eventuelle inngrep, seier han.