Få verksemder har merka koronakrisa hardare enn luftfarten.
Sidan mars har Norwegian hatt 11 store Boeing 787 langdistansefly ståande på bakken på Stavanger lufthavn Sola.
Men no forsvinn flya frå lagring i Noreg, dei skal ut i verda igjen. Men ikkje i trafikk for Norwegian.
Av dei elleve dreamlinerene som stod lagra, er det no berre åtte fly igjen. I dag dreg nok ein 787 til ut av flåten til Norwegian og til eigarselskap i Irland.
– Dette er godt nytt for Norwegian
Luftfartsekspert Jan Petter Helgesen meiner at det er bra for flyselskapet at dei får kvitta seg med flest mogleg av flya som står lagra.
– Dei bør jubla for kvar einaste Dreamliner som blir sendt vekk, det vil bety mindre å betala for det gjeldstyngde flyselskapa.
- Les òg:
Til saman har om lag 100 Norwegian-fly stått parkerte rundt om i landet. Kor mykje det har kosta flyselskapet er usikkert, men at det er snakk om mange millionar er det ikkje tvil om.
Journalisten er bekymra for framtida til Norwegian.
– Gjelda var allereie kritisk før koronapandemien slo til, no synst eg det er vanskeleg å sjå korleis dei skal komma seg ut av denne krisa.
Norwegian bekreftar at fleire fly er på veg bort
Flyselskapet er sparsame med kommentarar, men Charlotte Holmbergh Jacobsson i Norwegian stadfester at dei har kvitta seg med to Dreamliner-fly.
Ho vil likevel ikkje seia noko om kor mange fly som skal ut av selskapet.
Etter det NRK kjenner til skal nok ein Dreamliner reisa frå Stavanger lufthavn i dag, medan ein av dei åtte flya som står lagra på Sola skal tilbake til utleigeselskapet.
Fleire av flya som Norwegian nå har kvitta seg med har hamna i det italienske flyselskapet Neos.
– Framtidas Norwegian kjem til å satsa nordisk
Sjølv om Helgesen er skeptisk til framtida til Norwegian, trur han dei vil gjere lurt i å satsa på det som var grunnideen i selskapet.
– Dei må satsa på Noreg og Norden. Langdistanse med store og dyre fly er altfor dyrt, avsluttar journalisten.